Ka World No Tobacco Day (WNTD) da lehwarom ya ka ha ka 31 Naisan man-u-snem heiwa da pynsñiawthooh yei maa wa mih nei pynemkaam duma iwa ktah ya i chait i khiah, ka imlang sahlang wa ka rymaw hi waroh kawi. Ya ka WNTD da sdang ha u 1987 da ki ri wa em hapoh ka World Health Organisation (WHO).
Ka phang yong ka WNTD yong uni u snem man ko “Tobacco: threat to our environment”, heiwa da klam kammon u duma ktah u ya ka rymaw wa kamjooh i chait i khiah ki bru.
Ha Meghalaya, ka chnat puræ puthi kamjooh ka chnat i chait i khiah wa ka Sambandh Health Foundation (SHF) kawa man ka seiñ na Gurugram da sdang ki yei pynsñiawthooh kammon u duma ktah u ya ka rymaw.
Ha kani ka kynti da pynman ya ka Signature Campaign heiwa ki khynnah da pynche paidbah hajrong ka phang yong ka World No Tobacco Day (WNTD) yong uni u snem heiwa ha ka District ki khynnah da chimbynta chongchit ki.
U A. Baranwal, uwa man u Deputy Commissioner, East Jaiñtia Hills District da ong u wa u duma ym ktah u du ya i chait i khiah ki bru tangwa wot ya ka rymaw leh.
Chooh chooh da ong u wa i pynemkaam palat ya u duma wanrah i yei yap kamjooh i ktah ya i chait i khiah wei khia i ya ka manyung. Da pyntip u leh wa ka aiñ Cigarettes and Other Tobacco Products Act (COTPA) kreh ko yow wanrah ya ka Tobacco Free Educational Institutions namo ki thaw puræ puthi wa lait na u duma deiwa kreh wa ki khynroo khyllood wei kamjooh i kylla ha i rukom pyrkhat ki bru heiyatoh wa i pynemkaam duma wei wow pynduna hei wow pynemkaam.
Ha u Naitung (April), ka chnat i chait i khiah da phah ko ya ki ‘Meme’ ha ki WhatsApp cha ki Principal wa kiwa sikai skur kammon ktah i pynemkaam duma ya ka rymaw. Da em leh i ‘Meme’ heiwa kammon da thang ya uwi u dieñ wow pynmih 300 tylli ki sikret; wei kammon ki kymphaad (Filter) sikret pyntaroi ki yei thaw wei man ki leh ki wym py’ut wei kamjooh ki dawai wa man bih wa em ha u sikret; kammon i baam duma wei i mynthu pynsihdur i yei thaw. Ya kini ki Meme da phah won cha ki khynnah.
Ka Signature Campaign da emkaam leh ya ki khynnah wow pathai ya ka Wyrta wa klam heiwon wei kammon ktah u duma ya ka rymaw, ka manyung wa ki lok wei da phah soi pyrtuid leh ya ki bru. Da pynman leh ya i lai paidbah ki khynnah ha ki thaw paidbah, ki yaw wa ki thaw pynyieñ kari.
