Na i daw wa joor u slap ha kini ki soo sngi soo miet, kiwa boon ki sarok cha ki thaaiñ khappood wa ka ri Bangladesh kiwa da jæd da pra chwa, nang sih chooh chooh ki wei ini da wanrah ko yei eh wa khroo bha ya ki bru wa im cha khappood kiwa imja na ka rep ka riang.
Ha kini ki sngi wa da dep, boon bha ki mar rep kam u kwai, pathi, satrooiñ, ladaw wa kiwi kiwi ki mar rep da pyut lut neidaw wa ki kari kit mar rep ym ye ki wow lai luti nei oor khyndaw, i chlai um ki sarok wa ki thlu wa em tymbud u sarok.
Ini da ktah ym du chi chnong ar chnong, da ktah wot ya ki chnong khappood nadooh Huroi, Hingaria, Kwator, Narbor, Borghat, Kharkhana, Pasadwar, Lumpyngngad, Kamsing wa kiwi ki chnong khappood kiwa lai lyngba u surok Borghat, Kharkhana, Muktapur, Syndai ter ter chadooh Amlarem.
Iwa ktah bha ya ka lai ka wan yong ki bru ka thaaiñ toh wa em ki artylli ki wah khian ha ka chnong Kharkhana kitæ ka wah Amlati wa ka wah Amsakyrchoh, kini ki wah toh kiwa heh chisien wa joor u slap heiwa da chlai ki najrong u sarok wow lai kari, wei da chimpor da ki phaw kynta wei teiñ teiñ hadooh ar sngi le sngi wow khian ka um yow ye ki kari wow lai.
Neiliang kiwa chong chnong ka kharkhana, da pynlut bor ki wow pyndap moo wei khyndaw ha kini ki wah yow ye ki kari wow lai, wei neiliang kiwa chong chnong ka Kharkhana da jooh ood jooh naam ki cha ki bor wa toh u pait ya kani ka bynta, wei da e leh dei thoh cha kiwa mihkhmat kiwa da lai wa kiwa katni, wot cha dooh u PWD Minister u Prestone Tyngsong, u MLA ka thaaiñ u Lahkmen Rymbui, Chief Engineer PWD wa kiwi kiwa embynta ha kani ka kaam, tangwa hadooh katni ym em krehkaam, wei ha ini i por leh kam kiwa pynlai chnong da kyrpaad joor ki ya ki bor wa toh u pait wow sñiawbha pait lang ki khmat yarap cha ki, kamwa yoh lang kiwi ki chnong cha kiwi ki District khnang wow man i kyrkhu ya ka thaaiñ neibhah u sarok man u u budloom yong ka yoh ka kot.
