Ki Charaideo Maidams, kiwa man ki thaw tlep yong ki Syiem wa ki Montri ka Hima Ahom wa em ha Sivasagar District ka jylla Assam, da wanrah naam ki ya ka thaaiñ heiwa da tipmit ya ki da ka UNESCO kam ki World Heritage Site hapoh ka kyrdan Cultural Property kiwa man kattu kam ka thaw kawa 43 wa da yoh yeini i tipmit ha India.
Ini i tipmit da wanrah i yei kmen hapyrdi ki paidbah ka thaaiñ wa ka jylla neibhah ki Charaideo Maidam em ki ka bynta wa yajan bha wa ki paidbah neibhah wa pyntip ki yei man kyrpang ka jaitbru yong ki.
U Jiten Borpatra Gohain, uwa man u dkhot ka Charaideo Maidam Conservation Committee na Sivasagar da ong u wa dap ki dei kmen wei sarong wa da tipmit ya ki Maidam neibhah wa khana ki ya ka parom ka yong ki wei ini man i i yang iwa da slem bha wow yoh yeini i tipmit.
Ka Dr. Dolly Boruah, ka Professor ha ka History ka Dhemaji College da sñiawkmen ko deiwa ong wa ini man i wow sahkynmoo ya ka Assam.
Da ong ko wa ki Charaideo Maidam ymtoh man ki du ki thaw tlep tangwa man ki leh ka khiandwar wa wai yow tip ki bru ya ka parom ka jaitbru wa ka Hima Ahom.
Ki Charaideo Maidam man ki kam ki Mound næ ki loom khian wa man kam ki thaw pynchongngiah ya ki dkhot ki yung Syiem Ahom.
Ka Hima Ahom toh kawa synchaar ya ka thaaiñ Assam kamwa 600 snem nadooh ki snem 1200 hadooh ki 1800.
Ya kini ki Maidam da kheiñ leh wa man ki kam ki Pyramid ka Assam wa sariem ki wa ki Pyramid ka Egypt.
Ka Aniruddha Gogoi na Sivasagar da khana ko leh yei myntoi wa yoh deiwa em kini ki thaw khamtam wow wanrah e khih e kreh ya ki bru.
Discussion about this post