Neidaw wa kat dang mih ki sngi da chem wa ki khyllah jait wa wan na baar jylla wei na baar ri da sdang pynemkaam bakla ki ya ki kur ki jait wa da im da kha hapoh Ri-loom Jaiñtia, iwa ye u wanrah yei eh ya ki jait kur ka longbru manbru hadien habood, kamtæ ynne ka sngi u K.L. Pariat uwa chong chnong ka Tympang Iawmusiang Jowai da lai dawa u hakhmat u CEM ka JHADC u Thombor Shiwat hajrong i emkaam u tipmit noh daka aiñ yaki jait kur waphær wa em hapoh u pood u ang ka JHADC.
U Pariat da ong u wa neibhah kam ka yung krehkaam wa da pynkup bor da ka Sixth Schedule yong ka riti synchaar ka ri India neibynta u pynneh pynsah ya ki riti dustur, ka khyndaw ka chyiap, i por da dawa joor ko leh u tipmit ya ki jait kur.
Hawa klam cha kiwa thoh khubor, u K.L. Pariat ong u, lada laitlan kamni manda boon ki bru wa wan khih wan kreh na baar cha kani ka thaaiñ wei yoo ki leh yei myntoi i chngaaiñ, daw chim kabu ki ya ki jait kur waphær deiwa yaleh Online yow yoh ya ki EPIC wa ki Aadhaar hadooh wow yoh ST leh.
Hajrong ini kyntu joor u ya ka JHADC wym toh u e laad de ko wow jia kam ha u snem 2015 wa i chah pyndooh bor ki waheh chnong toh du nei daw wym em ka aiñ wa tipmit ya ki.
“Kamwa heipor wa man CEM da u Thombor Shiwat hi da ye u wow pynbait wei tipmit da ka aiñ ya ki Waheh Chnong, ki Dolloi, ki Sordar kamjooh yei krehkaam yong ki, yooluti O wa ya kani leh u pyndep u ka, wym u yang hadooh wow wan tuklar dei bor ka yung bichaar High Court,” pynrap u K.L Pariat.
Hei yachem u wa u Thombor Shiwat wa da emlang leh u Phasmon Dkhar, EM ka JHADC pyntip ki ya u K.L. Pariat wa da em i ya pynbait wa ki Dolloi neibynta u tipmit noh da ka aiñ ya ki riti dustur wei da em leh kiwa e yumut yow tipmit ya ki kur.
Heijooh i por u K.L. Pariat ong u lada ka Council wym leh won ko iyi iyi neiliang yong O ym yohsa u wow lai pynbor lyngba ka High Court khnang yow im ka kur ka jait wei u neh u sah ka jaitbru.
Ha ka chithi wa e kti u ha u CEM da thoh lang u leh kamwa duna 200 tylli ki jait kur waphær wa em hapoh Ri-loom Jaiñtia.
