Ka Education Cell ka HYC-CEC da ong ko wa i duna kiwa lait (Pass) ki khon u Ynñiawtrep ya ki Civil Service Exam kam ki IAS, IPS, IFS wa kiwi kiwi da man ko iyi iyi wa booh hei maa ya ki jaitbru wa ka jylla heiwa ki sahep sorkar kiwa na baar da yahbakla ki katwa ngait ki ya ki Montri wa ki MLA yong i kiwa duna hei nang i stat.
Da ong leh wa em ki Minister wa MLA kiwa biang tangwa ym yoh por de ki wow puræ kot neidaw wa boon ki kaam paidbah.
Ka seiñ da ong ko wow yooluti ya ka sorkar wow pynbiang ko ya ki Coaching Centre neibynta ki khynroo khyllood yong ka jaitbru yow yoh yei pynbniah, i pynkhreh neibynta ki Exam yong ka UPSC ym poi cheiwon cheiwon neibhah kiwa boon hi iwa dawa daw kut noh du ha i kular khlem i mihsoh.
Ki skur wa College kiwa biang hapoh ka jylla leh kamwa jooh chem ym toh ki yong ka sorkar wei man ki ki yong ki Balang næ ki seiñ niam næ yong ki chnong næ yong ki bru samen. Ki skur wa ki College wa da pynlai da ka sorkar leh chem wa chiboon bah kiwa duna wei ki dkhot krehkaam ha kiwa boon bah ki liang da pyndooh mynsien chiboon ya ki khynnah puræ ka jylla. Kam ka seiñ da sñiaw ko wow kyrpaad noh ya ki Balang næ ki seiñ niam wa ki chnong wa rap heh wow wai noh ki ya ki jar jiar ki Coaching Centre wa biang khang wa ki khynroo khyllood yong i u yoh ki yei sikai wa paka yow pynkhreh yow yakhun næ Pass yaki UPSC Exam waphær waphær.
Iwa ar, kam ka seiñ sñiaw ko wow dawa Scholarship noh na ka sorkar ya ki khynroo khyllood kiwa man ki tre jylla kiwa thrang wow lai pynbniah ha ki Coaching Centre waphær waphær neibynta ki UPSC Exam neibhah wa hadooh katni toh du kitu kiwa wan na ki manyung kiwa dap wa biang ha i yoh i kot kiwa yoh laad wow lai pynbniah ya idæ ha ki Coaching Centre wa rap paaw. Katwa kiwa wan na ki manyung wa duna ha i yoh i kot, hanlada thrang sakhiat ki wow yakhun ya ki Civil Service Exam ym joh bor neidaw wa ban ka dooh ka duk wei ini da pyndooh mynsien ko ya ki khynroo khyllood ka jylla kiwa em mynsien wow kreh chitom ha ki puræ puthi tangwa ym yoh yarap ki na ka sorkar.
Ha i jooh i por, ka seiñ ka sñiawngooh ko ya ka chnat puræ puthi deiwa pynemkaam da ka NCERT Syllabus neibynta ki khynnah MBOSE nadooh ka Class 7 hadooh Class 12, khlem da ktah won yaka MIL. Neibhah wa ini daw yarap ko ya ki khynnah wa pynkhreh wei kiwa em yei thmu wow yakhun yaki Competitive Exam waphær waphær kam ka JEE, IIT, NIT, NEET wei kamjooh ka UPSC. Neibhah wa kiwa pyndep yei puræ na ka MBOSE ki chem chitom ki lada hap wow yakhun ya kini ki Exam wot hapyrdi wa da yoh ya ki Coaching yong ki ha ki Private Coaching Centre neibhah ym yoh ki yei yurim chah sikai kawa yatoh wa ki Syllabus yong kini ki Exam kamwa yoh ki khynnah puræ kiwa pyndep na ki CBSE wa ICSE.
