Ki dkhot ka Sur ka Bri u Hynniewtrep da thoh ko cha u Montri Rangbah ka jylla wa cha ki 36 ngut ki MLA ka Khasi-Jaiñtia, heiwa da dawa pynchitom noh ya ki pulit wei wow e kti noh cha ka Central Bureau of Investigation (CBI) wow takit hajrong i chah siat yap u heh warim ka HNLC, u Cherish Starfield Thangkhiew.
U Thomas Passah uwa man uwi na kiwa yahkhmat kani ka dhab da ong u wa katkam ka jubab neiliang ka sorkar hajrong ka bui u Rtd. Justice T. Vaiphei, da ong ko wow paan pynche na ki pulit ka Tactical Team-1, tangwa neiliang ka Sur u Hynniewtrep da kwah bait ko wa kini ki pulit toh u jubab wei wow yasaaid ki ha yung kasari, ym ha ka sorkar neibhah ka sorkar ymye ko wow knieh ya i bor ka kasari.
Da ong u wa i thrang ki paidbah toh wow pynchitom noh ya ki bru wa emkti hadien wa da paaw ha ka bui wa da pynemkaam palat pood ya i bor da ki pulit ha ka Tactical Team-1. Da ong u wa i dawa wow e kti ha ka CBI toh wow ye u Charge Sheet wei wow pynchitom ya kiwa emkti katkam ka aiñ.
U Thomas da kylli u yei suki kiaw ki MLA hajrong iwa da jia wot hadien wa da yoh ki ya ka bui.
Hanla kiwa boon na ki MLA wa ki Montri sorkar hadooh u Montri Rangbah wa u Symbood Montri Rangbah ym em ki ha ki kamra krehkaam ha Secretariat wa ha Assembly Secretariat tangwa neiliang ka SKBUH da booh ki ya ki chithi ha ki kamra yong waroh ki MLA.
