Ka NSS Cell, NEHU wa State NSS Cell, Meghalaya da pynman ki ya ka Yuva Samvad kam chibynta ka North East NSS Festival wa da pynman ha Multi-Use Convention Hall, NEHU ynnin ka 21 tarik. Ka Yuva Samvad- ‘India @2047’ man ko kam chibynta i thong ka sorkar wow sñiawthooh yei angnood ki khynroo khyllood ka ri yow wanrah ya ka ri India wa thymme kat ha u 2047 iwa man leh i dap 100 snem i yoh laitlooid ka ri.
Kam chibynta ka Yuva Samvad da em ki 5 tylli ki rai wa da booh yow poi thong namo ki Panch Pran wa da wanrah da u Prime Minister, Narendra Modi yow pynman ya ka India kawa da roi da paar, u pyndooh yei rukom pyrkhat kam ha ki por wa chah synchaar ha ki pharæng, u sarong yei yong i da i, u man kiwa yatylli wei wow em i kitkhlieh kam kiwa chong chnong.
Kam chibynta ini da pynman leh ya ka yakob heiwa da em 2 ngut ki NSS Volunteer na kawi pa kawi ki 7 tylli ki jylla wa da chimbynta wow e yei klam hajrong ka phang “INDIA @ 2047” iwa man kam chibynta ka Panch Pran. Neiliang kiwa chimbynta da pynsñiaw ki yei angnood yong ki wow man ka ri India kat ha u snem 2047.
Ya kani ka yakob da jop da u Bomdar Dirchi (Arunachal Pradesh) uwa da yoh nyngkong, da bood da u Sagar Tamang (Assam) hei wa ar wa u Pyntngenlang Lyngdoh Rngaid (Meghalaya) hei wa le.
Neiliang u Vincent H. Pala, MP da wan u wow embynta kam u kongsan deiwa emlang wa Vice-Chancellor ka NEHU, u Prof. Prabha Shankar Shukla.
Neiliang u Vice-Chancellor da ban joor u yei emkaam wow pyndooh noh yei rukom pyrkhat kam kiwa dang chah synchaar ha ki pharæng iwa da ktah bha yei heh i san ka India da slem kattu. Heijooh i por da ong u wa sñiaw u wa em kyrmen yei mynried ka ri neibhah ki khynroo da pynkylla ki yei rukom pyrkhat ki.
Neiliang u kongsan da kyntu u wow pynlait wei wow mylliñ ya iwa sih deiwa lai chakhmat yow man ka mynried kawa phooh wa phieñ.
Katkam ki kyndon ka Yuva Samvad, neiliang u MP da yaklam u leh wa ki NSS Volunteer kiwa da kylli yeiwa emkaam u leh yow pynku yei roi i paar hapoh ka ri. Da kylli leh chaphang iwa da jia katni ha Manipur wei chaphang ka Reservation neibynta ki kynthai. Kiwa da embynta da pynsñiaw ki leh yei sñiawsuk yei jubab u MP.
