Ini wa dep hadien wa mih boon i dawa wow pynman da ka takit ya i kynrum kynram wa da mih hapoh ka MeECL heiwa neiliang ka UDP da dawa ko hadooh wow hiar chuki u Montri ka chnat Bordiñ u James Sangma, neiliang ka sorkar da mynjur ko wow pynman da ka takit wa laitlooid yow tih ya kiwa boon ki kaam wa ktah yei krehkaam kamjooh i dur ka MeECL.
Ha ka 30-06-21, ka sorkar da pynbna ko wa da chna ko da ka Independent Inquiry Committee wow leh ya kani ka takit deiwa thung ya u Justice Ifaqat Ali Khan, Retd. Judge, Allahabad High Court kam u Chairperson, u Manjoh Kumar, Retd. IAS kam u Administrative Member wa u Sunil Kumar, Retd. Executive Director, REC kam u Technical Member.
Kani ka Committee u takit ko heiyatoh waka MeECL wa ki le tylli ki chnat yong ka kitæ la Meghalaya Power Generation Corporation Ltd. (MePGCL), Meghalaya Power Transmission Corporation Ltd. (MePTCL) wa ka Meghalaya Power Distribution Corporation Ltd. (MePDCL). Kani ka takit toh neibynta i por iwa nadoh ka 01-04-2010 hadooh ka 31-03-2021.
Ka takit toh u thooh bniah ko yei rukom khut Tender, i rukom pynkrehkaam ka Corporation ya kiwa boon ki Scheme ka sorkar pyrdi, ki Scheme ka sorkar jylla wa kiwi ki kreh wa wan na baar heiwa toh u pait hadooh katwon da bood ya ki kyndon wa da booh. Wei wow tyrwa leh kammon wow leh yow pynbha pynmiat yei krehkaam.
Ka Committee u pait ko leh yei dooh nong nei rukom kheiñ bai bordiñ, i rukum lum bai bordiñ wei neiyi i daw wa joor i dooh nong iwa ym yahap de wa i bordiñ wa da e wa ka poisa wa ye u lum.
Hap leh wow takit yei rukom thung bru wakreh hapoh ka MeECL wa kiwi ki chnat yong ka wei yow chem leh heiwon da boon palat ki bru wei kiwon ki chnat wa da duna bru wakreh.
Da e por ya ka Committee wow pyndep ko ya ka takit hapoh 3 bnai.
