Da u khoo e sñiawbha u MLA ka Nartiang cha ka Namdong-B

U MLA ka Nartiang Constituency u Sniawbhlang Dhar da e sñiawbha u da u khoo cha kiwa chong chnong kiwa wa dooh wa duk hapoh ka chnong Namdong-B.

Ha chwa u saam ya u khoo da em ka yalang ka wa tbian kawa pynlai da u Talbi Pakbet, Secretary ka NPP Namdong-B wei da yoh ya i klam na u Primus Dhar, Adviser ka NPP Namdong-B uwa da pynsñiaw yei kmen wa khroo ya u MLA wa smat u wow e sñiawbha da u khoo cha kiwa dooh wa duk wa ha kam kini ki por wym yoh de ki u lai khih lai kreh neidaw wa em ka Lockdown hapoh ka ri wa da khut da ka sorkar India.

Heijooh i por da kyntu u leh yaki paidbah wow man ki kiwa bood ryntih ya iwa phah yong ka sorkar wow ya krehlang leh wa ka dorbar chnong khnang yow yoh yei yada na uni u khñiang COVID-19.

Da yoh leh yei klam na u waheh chnong ka chnong Namdong-B u Andrias Sumer heiwa hei klam yong oo da pynsñiaw u yei kmen wa khroo wei da e u leh yei yaroh ya u MLA ka thaaiñ wa da smat u wow e sñiawbha ya uni u khoo cha ki paidbah wa dooh kiwa emkaam yei yarap ha kam kini i por.