Khliehriat: Ka Meghalaya People United Front (MPUF) Khliehriat Circle, ynne ka sngi da lai e yarap ko da u khoo wa u salah cha artylli ki yung ri khonswet kawa tip kam ka Children’s Home Girls waka Children’s Home Boys kawa haap papoh i pait yong ka chnat Social Welfare yong ka sorkar Meghalaya, kawa em ha Khliehriat, EJH deiwa e mar 50kg u khoo wa u salah mar chi churia.
Hachwa wow saam ya kini ki baam da yoh laad leh wow pynman ya ka yalang kawa khian. Ha kani ka yalang da emlang u President ka MPUF Khliehriat Circle u Kyrshan Blah deiwa ya emlang ki dkhot, heijooh i por da ya emlang ka Cherry Dkhar kawa man kam ka Para Medical waka Nancymery Shadap kawa man kam ka Superintendent yong ka Children’s Home Girls. Ya kani ka yalang da pynlai da u Thawlad Lyngdoh uwa man leh u Secretary yong ka MPUF Khliehriat Circle.
Chooh chooh hakani ka yalang da yoh leh i klam na u Kyrshan Blah, uwa da ong wa ym ye u khlem da pynsñiaw i sñiawkmen hadooh kattæ kattæ wa neiliang yong ka seiñ hei kreh chitom hapoh i yahkhmat i yong oo da yoh laad ki wow e yarap cha kam kini ki khynnah khonswet, hanlada man ko i e wa khian leh, ka burom won man ko kawa heh tam hakhmat u bru u Blai. Da kyntu u leh ya kini ki khynnah wow man ki kiwa em salon wow kheiñ ki leh kam ka bei lane u pa ka yong ki ya kitai wa pait wa yoo ya ki pynkut u Blah.
Ha kani ka yalang da yoh leh ya ki kyntien khublei naka Cherry Dkhar, deiwa e ko ya ki kyntien kyrkhu kyrdoh cha kani ka seiñ khamtam ya kiwa yahkhnat ka yong ka wow im slem ko yoh u ye chooh chooh ko wow yarap ya ki a dooh wa duk khamtam leh cha kani ka thaw ri khonswet.
Discussion about this post