Shillong: Kam wow pynkhreh ya ka Election MDC cha ka ka Jaiñtia Hills Autonomous District Council (JHADC), ka seiñ saiñ pyrthai ka People’s Democratic Front (PDF) ynne ka sngi da pynskhem ko ya u Manbha Lyngdoh kam u kyrtong MDC naka 20 Muthlong-Sohkymphor Constituency.
U Manbha Lyngdoh toh uwa sikai skur uwa da biang ka puræ puthi wei da pynskhem ya oo da u President ka PDF, u Ivanlumlang Marbaniang ha ka yalang kawa pynman ha ka chnong Muthlong kawa da wan sakhi da ka bei u Manbha, ki payu para u kamjooh kiwa ha yung ha sem u kamjooh kiwa kyrchaan ya oo wa kiwi kiwi.
U Harwis Phawa, u waheh chnong ka Jalyiah, uwa jooh man leh kam u kyrtong MDC samen ha u snem 2014 da ong u wa, “I kaam kam u MDC toh u em u i stat i tip. U Manbha uwa man kam uwa sikai skur kamjooh u khynroo uwa embynta ha ka imlang sahlang man u u bru wa biang bha neibhah kam ki MDC em ki ka kitkhlieh ya ka jaitbru.”
Neiliang u Manbha Lyngdoh da ong u waka yurim wa yeiñ u wow yaleh MDC toh wa yeiñ u kam u khynroo wow yada ya ka jaitbru na ki aiñ wa thmu wow tyllep kiaw ya ka jaitbru.
“Nga da psiah O cha ka PDF neidaw wa ka Party em ko ka yurim wow yada ya ka riti dustur, i man hok man tre ya ka khyndaw ka chyiap, i ktien i thylliej wa kiwi kiwi ki bynta wa nga yieng yaleh Election O.” da ong u Manbha.
Kiwi de kiwa em ha kani ka sngi kynthup ya u Joining Dkhar, waheh chnong ka shnong ka Khlieh Myntriang, kiwa yahkhmat ka PDF na West wa East Jaiñtia Hills District Committee.
Discussion about this post