Ka Hill Farmers Union (HFU) da em ko i kyrmen wow em i ku ha ka chalan ya ki mar rep lyngba ka kaad khayi khappood yong ka Tamabil (Dawki) cha Bangladesh deiwa ya krehlang wa ka Meghalaya International Exporters Chamber of Commerce (MIECC).
U President yong ka HFU u Commander Shangpliang da pyntip u wa hadien wa ka seiñ da chah khut sñiawbha wow ya emlang ha ka sngi wow wai biang ya ka kaad khayi khappood Dawki Land Custom Station (LCS), ka seiñ khlem da kyntait da lai ko wow ya emlang ha katai ka sngi deiwa yooluti wow kyntu ya i pynlai yaw ya ki mar rep.
Da pyntip u wa lyngba kani ka kaad khayi da sñiawthooh wa i chalan mar cha Bangladesh ym toh du yaki moo wa u mooyong, tangwa toh leh wow khayi ya ki mar rep, kamtæ ka seiñ leh smat ko wow ya krehlang wa ki Exporter kiwa em ya ka License.
U Shangpliang da pyntip u wa ki warep da yooluti ki wa daw yoh wow dai ya ki mar rep ha i dor wa biang lyngba kani ka thaw khayi. Da pyntip u leh wa ha kani ka sngi wai da phah psiah nyngkong ya ka truck kawa kit sapdok wei ka seiñ da e khublei ko yaka MIECC kiwa pynsñiaw yei sbun wow yarap pynlai yaw ya ki mar rep.
Ka seiñ da e khublei ko leh ya ka sorkar neibhah wa hadien 5 bnai wa da khang ya kani ka kaad khayi khappood Dawki da wai biang ha kani ka kynti. Da ong u leh wa ka seiñ da yooluti ko wa daw yoh wow chalan boonjait ki mar rep kam u syiñ, sapdok, piskot wa kiwi kiwi cha Bangladesh.
