U Waheh Chnong ka Tuber Kmai Chnong, East Jaiñtia Hills District, u Micky Lyngdoh deilang wa u Secretary IVCS, u Denis Lyngdoh haka miet yong ka 3 tarik uni u bnia da chah thlieh pynmynsoo ki da u sdai ha u Training Phawa uwa na kani hi ka chnong katwa dang thmu pynjem ki yei kulmar wa jia ha katai ka miet ha kani ka chnong.
Kiwi won wa mynsoo malu mala kynthup ki ya u khynnah wa 19 snem heiwa da lait salit u na u sdai uwa dapoi ha rupai yong oo katwa uwi won da yinrot u malu mala.
U Micky Lyngdoh uwa da mynsoo hadooh wa da chynna ya u thied ka kti nei toh ha u sdai, nyngkong da pynkit ya oo cha Woodland WK Hospital Sabahmuswang, hadien won da kyrriah cha Super Care Hospital Shillong katwa u Secretary IVCS, u Denis Lyngdoh uwa da mynsoo joor hei bynta i khlieh hajan chkoor da pynkit cha Jowai Civil Hospital, Ialong.
Katkam i khana u waheh chnong, da ong u i jia da sdang i katwa u Asst. General Secretary ka chnong deilang wa ki lok dang lai ki ha sarok wei da wan poi kawi ka Scooty kawa yah pynhær kawa da lai najan hi-wot yong ki, kamtæ da khyrngiat wei klam ki hajrong i yah khlem akor yong ki, tangwa kini ki ar ngut ki khynroo wa chong ha Scooty da sangeh wei dat ki ya u Asst. General Secretary ka chnong.
Hadien wa mih i kulmar, u Asst. General Secretary chnong da Phone u cha u General Secretary yow wan pynjem u yei kulmar, kamtæ u General Secretary da khut lang u ya u Secretary IVCS wei da pyntip haroh u cha u waheh chnong.
U waheh chnong khana u wa heipor wa mih u na yung da wan kawi ka kari Creta rong lieh wa em u Training Phawa kawa da lai chwa ya oo, wei manda poi u waheh chnong hei thaw wa jia, ym em de i yachoh ya awri, tangwa heipor wa mut u klam yow phah liwan ya kitæ ki khynnah wa yah Scooty, heitæ wot u Training Phawa da pait u cha oo wei dat u ya oo da u sdai wa da kdoh da kyllaiñ bha ha kti u Training wei da chna kyrpang wa da sai u napoh ka kari heiwa u waheh chnong da toh u da uni u sdai hei bynta ka kti timun u.
Ya u Secretary IVCS won da da toh u hei bynta ka khlieh hajan chkoor hadooh wa wiar yong bru u heitai i por wei da pynkit ya oo cha Jowai Civil Hospital, Ialong.
Hadien wa da kit ya u Secretary IVCS, u Training Phawa da lai klam u ya u waheh chnong deiwa ong wym em mut u wow leh khnang wei i sai sdai yong oo na kari toh wa yoo u yei boon ki paidbah.
Hajrong ini, u waheh chnong ong u itæ toh i tbian yumut yong oo neibhah napyrdi ki paidbah wa em heitæ i thaw wym em uwi wot leh wa rah tiar pynmynsoo næ wot tang u dieñ leh.
Hei sakhiat kam u bru wa jooh ksoh hei kaam imlang sahlang khamtam katni ksoh u kam u President Jaiñtia National Council Tuber Circle toh u wan u dei thmu u pynjai-jai yei awri næ i bakla ki khynnah, hantæ pna oo wa nangpynheh yei awri wei sai u leh da u sdai u tiar wa pynmynsoo.
Da ong u leh wa kam u waheh chnong da dep ujor FIR u pyrchah ya u Training Phawa wei kamwa ka Case da lai ko chakhmat yooluti u wa ki bor ka aiñ u chim ki yei bichaar wa hok.
Neiliang ki paidbah ka chnong Tuber Kmai Chnong won leh ynne ka sngi da pynman ki i ya mih paidbah deiwa rah lama yong kam ka dak u pynsñiaw yei pyrchah joor yei kaam thombor hapoh ka chnong ka thaw khamtam ya kiwa yahkhmat chnong wa yieñ neibynta u wanrah i bha i miat.
Chwa u sdang kani ka lai paidbah, neiliang u waheh chnong uwa da yoh u emlang da pynche u cha ki paidbah hajrong i jia haka miet ka 3 tarik wei ong u leh wa ini i mih paidbah ynne ka sngi man ka dak wow beiñ joor ya kam kini ki jait bru wei ymtoh de u jia i neini chakhmat.
Heijooh i por kyntu u yaki paidbah ka chnong wa hawa em iwon iwon i kulmar wymtoh u pynemkaam da ki tiar pynmynsoo tangwa u klam dei ktien emakor emburom itæ toh wa emkaam tam.
U Secretary IVCS hanla da mih u nei thaw sumaar leh ympu ye won u wow emlang neidaw wym pu chait bha u.
Kiwi won wa e i klam ha Madan Yurim chwa u sdang ka lai paidbah kynthup ya u Molting Phawa, Secretary VDP, u Embi Sana, Waheh Chnong warim wa u General Secretary, u Tellmetrue Phawa.
Discussion about this post