Ka seiñ kiwa dai dohmasi yong ka West Jaiñtia Hills District, ha ka yalang kawa da man ha ka madan yong ka yaw dai ya ki masi choh doh kawa em hajan yong ka yingkieñ Pamblah, harood yong u sarok Jowai-Shillong hajan ki thaw sait kari, chwa wow poi cha ka yingkieñ Myntdu da rai ki wow pynman biang ya kani ka yaw kawa da rim kamwa jooh ha i por kiwa nachwa, iwa mut wa katni kani ka yaw dai masi toh kawa da krehkaam biang.
U President ka seiñ, u L. Dkhar da ong u wa kani ka yaw toh kawa jooh man chisien chi tayaw ha ka sngi Musiang namo ka sngi man yaw ka Iawmusiang Jowai, wei katni kani ka yaw da sdang biang ko u krehkaam biang, kamtæ da kyntu u ya waroh kiwa chongdai wa kiwa thied kiwa jooh wan cha kani ka yaw wow ya wan ki kamwa jooh hadien wa ya kani ka yaw da sangeh chipor nadooh u snem 2020 ter ter neidaw wa em ka khlam COVID-19.
U Secretary, u Yoolang Ryngkhlem da ong u wa kamwa man katni da yoo wa kiwa dai wa thied da sdang ki wow wan cha kani ka yaw, kamtæ da kyntu u ya kiwi de wow wan cha kani ka yaw dai masi choh doh kam nachwa.
Neiliang kiwa dai wa kiwa thied leh ynne ka sngi da pynsñiaw ki yei sñiawkmen hawa da yoh biang ya kani ka yaw neibynta wow pynsuk ya kiwa dai wa thied masi choh doh.
