Khliehriat: U Deputy Commissioner ka East Jaiñtia Hills District, u F.M. Dopth, ynne ka sngi da wai u ya ka East Jaiñtia Hills District Welcome Arch ha Tuber Shohshrieh, East Jaiñtia Hills District.
Hawa e yei klam, u F.M. Dopth, da ong u wa kani ka khilon wow pdiang burom ya ki bru chapoh ka District toh kawa da chna deiwa ya krehlang ka sorkar wa ki bru samen (Public Private) wei da chna ya ka da ka Star Cement Limited.
Da e khublei u leh ya ka Dorbar Chnong wa ki tre thaw wa da yakrehlang ki neibynta ini i kaam kamjooh leh ya ki bru ka Star Cement Limited.
“Da kyrmen i wa kani ka khilon wow pdiang ya ki bru chapoh ka District daw wanrah ko yei mynsien wa kmen ya ki bru wei daw e mynsien leh ya kiwi tawon ki kaam pynroi ha ki por wow wan lyngba ki karkhana khyndaw-bilat,” da ong u Dopth.
U S.S. Syiemlieh, uwa man leh kam u Additional Deputy Commissioner, ka East Jaiñtia Hills District, wa u S. Marwein, EAC, BDO Khliehriat & Saipung Block wa u Khroo Ksoo, uwa man kam u waheh chnong da emlang ki ha kani ka sngi.
Hajrong ini waroh, da sakhi wa i kreh wow pyndep ya kani ka khilon dang man i iwa sah neidaw wa dang em ki Pipe talawiar ki chrot wa pynchong ya kani ka khilon wei da em leh ki paidbah na ka chnong kiwa phylla wa ym em wa tip wa da wai ki ya kani ka khilon nebhah wa i kreh dang man i iwa dang lai bait.
Yoosarom wa jhan ka sorkar wow wai ya kani ka khilon khlem em wa tip wei hawa i kreh dang lai bait i, da ong kawi na ki manbei na kani ka chnong.
Neiliang uwi na ki tre chnong (uwa ym kwah u pymih pyrtuid) da kyntu u ya ki bor sorkar wow pyndep hok yei kreh wei ymtoh u jhan ki wow wai donhi deiwa ieh ya ki kreh khlem pyndep pura neibhah ini daw pynsihdur pathan i ya ka chnong waroh kawi.
