Ynnin ka 18 tarik, ka chnong Moolamylliang kawa em ha East Jaiñtia Hills da wai paidbah ko ya i pynriam Christmas kawa tip kam ka ‘Christmas Lights Extravaganza’ deiwa emlang u SS Syiemlieh, Deputy Commissioner ka East Jaiñtia Hills kam u kongsan, deilang wa u Dr. Sankey Shangpung, Chairman JHADC, ka Dr. R. Toi, CHC Sutnga.
I pynkhreh wei pynriam ha uni u snem man ko kawa heh bha hawa nujor wa u snem wa da dep deiwa pyndait khrik-khrak wa boon rong ya waroh ki dieñ wa iwa em hapoh kani ka chnong. Ym du ki khrik-khrak, da pynchna pynwandur ya kiwa booh ki dak ki chin wa yatoh waka Christmas.
Kam chibynta won wa i dap 50 snem yong ka jylla Meghalaya, ka chnong da chna kyrpang leh yaka Map yong ka Meghalaya kawa da pynemkaam du da ki dieñ kiwa da thung kawa em leh ya u chap (Logo) wa dap 50 snem ka Meghalaya.
Ya kani ka thaw u wai man-ka-sngi heipor 5:00 janmiet hadooh ka 02-01-22.
Ym em chim bai psiah tangwa da booh daka Donation Box wa ki Gate Pass Donation yow e yarap.
