Jowai: U SP ka West Jaiñtia Hills u R. Muthu ynne ka sngi da wai u ya ka Website ka yung krehkaam yong oo kawa man kawa ar hapoh ka jylla hadien ka East Khasi Hills heiwa ki yungkrehkaam ki SP da em ki jar jiar ka Website.
Ka I. Rymbai ka sahep ka NIC kawa emkti wow chna ya kani ka Website da ong ko wa ka juk katni toh kawa chaniah ha ka Internet, wei deiwa em kam kani ka Website daw yarap ko ym du ya ki pulit kamjooh leh ya ki paidbah.
Da ong ko leh wa chwa wow ye u wai ya kani ka Website haap emkaam u yoh bor kam ki Domain Name wa kiwi kiwi naka NIC, Delhi kamtæ da chimpor ko u wai paidbah ya kani ka website tangwa deiwa yakrehlang lang wa ka yungkrehkaam u SP ym em sepai ini i por neibhah da yoh u pynbait ya kynjnit kynjnat yong kani ka Website.
Neiliang u Additional SP ka WJH u C. Syrti da ong u wa na ki por cha ki por kiwi kiwi ki tnat pulit da jooh kylli ki ya oo wa lada em u ya ka website ka Office yong oo wei sñiawkmen wa ynne ka sngi da yoh ya kani ka Website tangwa lada ym kyntu ya ka wa ki kaam wa leh ki pulit man ka sngi nadooh ki kaam esikai, ki kaam yarap paidbah hadooh ki kaam pyrchah aiñ kani ka Website daw man ko kawa sep-ai. Kamtæ da yooluti u wa i krehlang ki pulit waka NIC daw ye ko u pynman sakhiat ya ini waroh.
U SP won da pyntip u wa da sdang nyngkong deiwa chondur ya ka yung krehkaam hadooh wa da haap phah niaam rong thymme ya ka wei ini toh nadooh ynnin u snem, kamjooh ki dur kiwa kreh kani ka ophis wei man ka sngi da pynbait yeiwa duna kani ka Website chwa wow ye u wai paidbah ka.
Da ong u leh wa lyngba kani ka Website ki paidbah ye ki ujor FIR wei ym emkaam de u wan cha Police Station wei daw ye ki leh u boodien ya ka ujor yong ki lyngba kani ka Website.
I pyrtuid kani ka website toh www.jowaipolice.gov.in
Discussion about this post