Ynne ka sngi ka Welcome Arch namo ka khilon wow pdiang burom ya ki paidbah cha ka East Jaiñtia Hills kawa em ha Tuber Chohchrieh da wai paidbah ya ka ha ka yalang wa emlang u Montri ka sorkar jylla uwa pait ya ka Social Welfare kam u kongsan hei emlang u MLA ka Mawphlang, u Eugeneson Lyngdoh.
Ha kani ka yalang da emlang u SS Syiemlieh, DC ka East Jaiñtia, u SP, u JS Dhanoa, u Khroo Ksoo, Waheh Chnong, u Emlangly Lamare, Director Star Cement wa kiwi de.
Ya kani ka khilon da chna da ka Star Cement chirup wa ka sorkar hapoh ka PPP Mode ha i lut wa T. 30 lak wei neidaw wan ka khlam COVID-19 da chimpor wow chna ya ka hadooh 3 snem.
U SS Syiemlieh hawa e i klam wa i daw wa booh ya kani ka khilon toh kam ka dak wow pdiang ya ki paidbah chapoh ka District wei ini ym mut ko wa kani man ko u pood ka East Jaiñtia wa ka West Jaiñtia.
Da ong u wa kani man ko ka dak wow sahkynmoo ya ki paidbah ka chnong deiwa kyntu ya ki paidbah wow sumaar wei wow yada ki ya kani ka khilon.
U Emlangky Lamare hawa e yei klam da ong u wa ya kani ka khilon da chna wow pynyoosuk ya kiwa wan na kiwi ki thaw heiwa da kyntu ya ki paidbah wow yada ki ya ki motdur wa em ha kani ka khilon.
Kam u kongsan, u Kyrmen Shylla da ekhublei u ya kani ka karkhana heiwa da kyntu u ya ka karkhana wow e ko ya ka CSR khamtam ha ki thaw uiñke suwari kiwa boon hapoh ka District kiwa emkaam wow chna pynmiat.
Heijooh i por da kyntu u ya ka karkhana wow chna sa kawi ka khlion na i thaw psiah chapoh ka jylla lyngba ka East Jaiñtia Hills.
Kiwi kiwa da klam ha kani ka sngi toh u Siddharth Banerjee uwa da pynlai ya kani ka yalang, u Khroo Ksoo, u Devender Bhansal wa kiwi kiwi.
