Ka yalang wai pyrda ya ka 2nd North East Olympic Games 2022 da pynman ynnin ka sngi ha Pinewood Hotel, Shillong deiwa emlang u Montri Rangbah ka jylla, u Conrad Sangma, u Chief Secretary, u DP Wallang, u Commissioner & Secretary, Sports & Youth Affairs, u Dr. Vijay Kumar D, ki dkhot ka Meghalaya State Olympic Association, ki sahep ka chnat Sports wa kiwa yalehke.
U Conrad hawa e yei klam da ong u wa ki khynroo ka jylla ym toh kiwa kom wei emkaam ki yei kyrchaan. Da ong u leh wa yow yoh takma ha ka National Games hadooh ka Olympics, hap wow jied wei wow sikai nadooh dang khian.
Da ong u leh wa kani ka 2nd North East Olympic Games 2022 ha Meghalaya toh kam chibynta wow lehkmen ka jylla yei dap 50 snem yow chem ya kiwa em yei sap khamtam ha ka jylla kawa em chiboon kiwa em yei sap ha ka yalehbol.
U Montri Rangbah da pynlait u leh ya ka chap wa u Mascot kani ka North East Olympic Games, ka Website ka North East Olympic Games 2022, ka kot lakdop ka North East Olympic Games, ka Mass Talent Identification Programme yow thooh ya kiwa em sap waka Cheque cha ki State Sports Association yow pynman ya ki Coaching wa ki Training Camps neibynta ka North East Olympic Games 2022.
12 ngut kiwa yalehke ka jylla kiwa daw chimbynta ha kani ka 36th National Games 2022 ha Gujarat da pyn-eh daw ya ki chwa u lai ki ha kani hi ka yalang.
Ka North East Olympic Games toh kawa da pynman nyngkong ha Manipur ha u 2018 wei kani ka wa ar daw pynman ha Shillong nadooh ka 10 hadooh ka 16 tarik u Khonchonglad (Nov) 2022 wei daw em palat 3000 ngut kiwa yalehke kiwa daw chimbynta ha ki 18 tylli ki jait yalehke.
Ya u Mascot kani ka North East Olympic Games da e pyrtuid kam u Neo uwa da pynwan dur hei dur u Clouded Leopard uwa man leh kam u State Animal ka Meghalaya wei da pynriam ya oo da ki that wa pynemkaam da ki jaitbru ka Meghalaya.
