Ka Balang Katholik Pamrakmai ha ka 28 tarik u Naisan da pynman ko yei sdang lehkmen dap 75 snem ka Maria Syiem U Rosary Bakhuid Balang Katholik Pamrakmai ya kawa da sdang nyngkong yei ngait Kristan ha kani ka chnong da ki chiphaw ngut ki Kristan wa nyngkong na ka kur Siangshai, kitæ ka Maria (Kso) Siangshai, ka Regina Siangshai, ka Nerella Siangshai, u Petrus Siangshai, u Blasius Siangshai, u Kilbert Siangshai, u Paulus Siangshai, u Norbert Siangshai, ka Bena Siangshai ha ka 03-05-1949.
Kam chibynta i wai pyrda dap 75 snem, da wan wai leh ya u mooyurim kamjooh wow pynhær ya ka lama Jubilee yong ka Balang da u Justine Dkhar, MLA warim ka Khliehriat kam u kongsan (heithaw ka Santa Mary Shylla, MLA 5-Sutnga Saipung Constituency).
Ha chwa wow sdang yei ngooh i dem Blai, da yoh ya ki kyntien pdiang burom na u Chairman Balang, u Hilarius Siangshai uwa da pdiang sñiawbha ya ki Lyngdoh Sohblai kam kiwa pyndep ya ka niam ka rukom, ya kiwa yalam ka Parish Pastoral Council, ya kiwa kitkaam ka Pamra-Jalyiah Circle, ya ki Rangbah Balang, kiwa chah khut sñiawbha nadooh u waheh chnong, u Iaikiewbha Rymbai, u Bormi Dkhar, symbood waheh chnong, kamjooh ya waroh ki paaid para wa ngait yong ka Balang.
Ya ka knia ka khriam Blai da pyndep da u Rev. Fr. Aibor Dennis Nongbah, Parish Priest Ladrymbai, deiwa synraanlang u Assistant Parish Priest, u Rev. Fr. Ebormitre H Lamre chirup wa ki Sister, ki Headkatekis wa ki paaid yong u Blai hajrong ka phang: “To kynmaw ïa ki kam phylla ba U la leh,ïa ki kambah jong U”- 1 Jingthoh Kynmaw 16:12.
Yow pynphooh pynphieñ ya kani ka sngi lehkmen yong ka Balang, da yoh i chaad i rwai, i put i tem wa da pynkhreh da ki khon yong ka Balang.
Hachwa wow pynkut ya kani ka sngi sdang yong ka yalehkmen da yoh i klam khublei sñiawngooh na u Wellson RD Siangshai, uwa man kam u Finance Secretary yong ka Platinum Committee.
