Shillong: Ka Police Station wa dang thymme hapoh ka jylla wa tip kam ka Diengpasoh Police Station wa em ha East Khasi Hills District da wai ya ka ynne ka sngi da u montri ki kaam pohyung u H.D.R. Lyngdoh ha ka yalang wa pynman ha chnong Diengpasoh.
Ha kani ka yalang da emlang u Dr. S.B. Singh, DGP, u Pyniaid Sing Syiem, MDC ka thaiñ, u A. R. Mawthoh, DIG, Eastern Range, u P.S. Dkhar, Deputy Commissioner, East Khasi Hills, u D.N.R. Marak, Superintendent of Police, East Khasi Hills, u G. Wahlang, Sordar Diengpasoh wa kiwi kiwi.
U Montri hei klam yong oo da ong u wa kani ka Police Station wa thymme daw yarap bha ko ya ki paidbah kani ka thaiñ kiwa na chwa haap lai ki ha Rynjah Police Station ya ki kaam wa khian wa nai heiwa lut i por wa ka poisa yong ki.
Da ong u leh wa i pynmih ya ki Police Sation wa thymme man i kam chibynta wow e ya i chakri cha ki paidbah yow pynbiang yei pynkrehkaam ya ka aiñ wow wanrah ya i suk i saiñ ha ki chnong ki thaw.
Da pteiñ u deiwa ong wa ka sorkar ha kini ki snem da sdang ko boon ki kaam pynroi hapoh ka jylla yow kyntu kynrong ya waroh khamtam kiwa im cha palatchnong. Kamtæ da kyntu u ya ki paidbah wow krehlang ki wa ki tnat sorkar yow wanrah chooh chooh ya kaam pynroi kani ka thaiñ.
Deiwa pynmih ya ka Diengpasoh Police Station ki chnong wa em hapoh yong ka ym em de ki hapoh ka Rynjah Police Station wei kini ki chnong kynthup ki ya ka Sohlaper, Mawiong, Ummir, Mawsharoh, Mawthumthum, Ryngksaw, Diengpasoh, Jaroit, Mawkhanu, Mynriang wa Nonghali.
U B. Marbaniang u man u kam u Officer-in-charge ka Diengpasoh Police Station.
Discussion about this post