Wow pynyoosuk ya iwa da e ka rymaw ya ki bru khamtam ha ki ar tylli ki thaw wa kyntang wa kynthup ya ka Khloo Pohblai Mooshutia wa ka Khloo Thangbru Umsymphu wei wow pynsuk ya kiwa wan paitke ya ki khloo kyntang ha Mukhaialong, da wai paidbah ya ki kreh wa da pyndep ha kini ki khloo ha ka 26-10-2020 ha ka yalang wa da pynman hapoh ka Yung Dorbar ka chnong Mukhaialong heiwa da em ryngkat ka H. Lato, Divisional Forest Officer, Jaiñtia Hills Wildlife Division, ki dkhot ka Management Committee yong ki ar tylli ki Community Reserve wa kynthup ya Ka Khloo Poh Blai Mooshutia Community Reserve wa ka Khloo Thangbru Umsymphu Community Reserve wa ki dkhot ka chnong Mukhaialong.
U Chairman kani ka Committee u Hundred Phawa uwa man leh u Waheh Chnong ka chnong Mukhaialong da ong u wa ka Committee dap ko dei kmen wa khroo wa ka Jaiñtia Hills Wildlife Division da yarap ko wow chna ya ka Rain Shelter, luti lai-kjat cha u Moo Kyntang Mooshutia, ka paikhana, ka Spring Chamber, ki chuki chongke wa ka Check Dam hapoh ka Khloo Thangbru Umsymphu neibynta wow pynpoi um baam ha ki katto katni ki dong hapoh chnong.
Da khana u leh wa lyngba i kreh ryngkat wa ka Wildlife Circle ka chnong da yoh ko chiboon i myntoi neibynta i bha i miat ka chnong.
Neiliang u S. Law, Range Forest Officer, i/c Umkiang Wildlife Range da yaroh u ya kiwa chong chnong kiwa man kiwa smat wow kreh ryngkat wow pynneh pynsah ya ki mrad.
U P. Kyndait uwa man u Chairman Chnong ka Mukhaialong da ekhublei u ya ka yung krehkaam ka Divisional Forest Officer, Jaiñtia Hills Wildlife Division wa ki dkhot ka Management Committee yong ki ar tylli ki Community Reserve hapoh ka chnong.
Ka H. Lato da khana ko wa ya kini ki kreh da leh lyngba ka Scheme Centrally Sponsored Scheme Integrated Development of Wildlife Habitat yong u snem 2018-19 neibynta wow yarap ya ka chnong hei wow pynku ya ka Eco-Tourism ha kini ki khloo wei wow yoh u kreh ryngkat na ki paidbah kam kiwa yada ya ki mrad wa ki khloo.
Da ong ko leh wa ympu yoh yukheiñ yeiwa em ha kini ki ar tylli ki khloo, wei dang chem wa em 67 jait ki sim wa chiboon ki jait ki dawai kymbat iwa pynyoo wa kini ki khloo man ki kiwa mahajon deiwa kyntu ya ki paidbah wow sumaar ya ki.
Da kyntu ko leh ya ki paidbah wow man ki kiwa lehkhooid ha ki yung ki sem ki soodong sookun neibhah i lehkhooid man i iwa kongsan tam khnang wow ye ki u riñ ya kiwa wan uiñke suwari wei wow man ki ki bru thooh bniah hajrong iwon iwon wa em hapoh ki khloo khnang wow ye ki u batai ya kiwa wan paitke.
Ha kani ka yalang da yoh ya ki kyntien khublei na u H. Sana, Assistant Waheh Shnong, Mukhaialong.
Kani man ko katkam ka Wyrta khubor na u H. Phawa, Waheh Chnong, Mukhaialong, East Jaiñtia Hills District.
