Ka dukan dai ja yong Pakynteiñ wa em ha Ladthadlaboh, Jowai mar pyrchah ka Petrol Pump, da ye u pynheh pynkmai chooh chooh ya ka deiwa wai sa ya ka Restaurant heijooh hi i thaw, iwa mut da ye u yoh lut yei jait baam wa kynthup yong yei yong Chinese, Indian wei yong Pnar.
Da em leh ka Conference Hall ha kani ka thaw, heiwa ki paidbah ye ki u wan pynman ya kiwon kiwon i lehkmen, kamjooh leh kawon kawon ka yalang.
I pyrtuid kani ka dukan toh ka S. Pakynteiñ Restaurant.
Ya kani ka Restaurant da wai ya ka ynne ka sngi da u Wailadmiki Shylla u MLA 2-Jowai uwa da e yaroh leh ya ka tre dukan, ka Shibor Pakynteiñ hajrong i chimkhia yong ka ya kani ka khih hadooh wa ye ko u pyndap pynbiang ya ka yung ka sem ki khon ki kti.
Da kyntu u leh ya ki khynroo khyllood u pait ya ka nongmuna ka Shibor Pakynteiñ neibhah wa boon ki bru wym rap ka-it ki u sdang kam ini i khih, iwa ka sdang nyngkong ko na i dukan khian tæ ye won ko u nang pynheh pynkmai yei khih.
Da kyntu chooh chooh u wa chwa wow sdang seiñ khih emkaam leh u pait ya ka yaw wa yoo man dai hi mo ha i thaw wa mut u seiñ khih.
Ha kani ka sngi da yoh leh i duwai na u Rev. D.S. Diengdoh wei klam kyrkhu kyrdoh lyngba ka ktien u Blai na u Rev. E. Nongpluh.
Ya ka yalang wa pynlai da u P.R. Lamare da emlang leh u Waheh Chnong ka Mihmyntdu, u A. Phawa, kiwa ha yung ha sem ka Shibor Pakynteiñ wa kiwa chah khut sñiawbha.
