Da wai ya ka Borbon Hotel & Restaurant ha Jowai

Ynne ka sngi ka chnong Jowai da yoh ko sa uwi u moomær heiwa u Health Minister, u Wailadmiki Shylla da wan wai u ya ka Borbon Hotel & Restaurant kawa em ha Loomsooiung, New Hill ha ka yalang wa khian.

Ya ka yalang da pynlai da u M. Passah heiwa da yoh ki kyntien pdiang burom na ka R. Kdup Passah wa i ngooh Blai na u Valentino Paswet.

U Kitbok Passah da khana u wa ya ini i thaw nyngkong da chna ya ka Cinema Hall da ka beipun ka yung ka Tibon Passah wa u Riata Toi wa ki khon yong ki heiwa i yah ka juk da pynhiar ya ki yaaw phlim kamtæ da pynsangeh noh ya ka Cinema Hall ha u 2011.

Da khana u wa da booh thong ka yung wow booh ya ka Borbon Complex ka wow em ya ka Hotel, Restaurant, ka Gold Gym wa ka Shopping Mall heiwa da sliah noh ya ka Cinema Hall wei da sdang yei kreh ya ka ha u March 2016 wei da ye u pyndep ya ka ha u February 2026.

U S. Kmen Lato kam u khon ka Kur Passah, hawa e i klam da khana u ya ka parom wa chna ya ka Borbon Cinema Hall wot hei wow thied ya ki Screen wa Projector neibynta ka Hall na Calcutta wei i dor ka bai Fight na Guwahati man ko Rs. 420.

Da khana u kammon yoh yei pyrtuid Borbon deiwa chim nei pyrtuid ki ar ngut ki Beipun ka yung, ka Longbor Passah wa ka Tibon Passah wei da mih i pyrtuid Borbon Cinema Hall.

Neiliang u Wailadmiki Shylla da ong u wa ha ka 6 tarik ka sorkar MDA dap ko 8 snem i synchaar ya ka jylla heiwa da pynman ya ka yalang ha Tura wei i daw wa neh u ha Jowai toh neibhah wa kmen u wow embynta ha ki kaam wa bha kam ynne ka sngi neibhah wa ka’it i mynsien u wow yoo wa ku ka Jowai Constituency.

Da batai u ya ka scheme CM Elevate wow chna ya ki Cinema Hall ha Shillong, Tura wa Jowai heiwa ka sorkar u e yarap ko da ka Subsidy wa ka ram cha ki bru.

Chooh chooh da khana u wa kam u Sports Minister kwah bha u wow wanrah chiboon ki yalehke ha Jowai wa West Jaiñtia neibynta ka National Games tangwa chitom neibhah wa duna ki thaw sah.

Da khana u wa ka sorkar da pynchlur ko wow chna ya ki Homestay wa ki Boutique Room deiwa booh ya ki Scheme neibynta ini.

U Wailadmiki da e khublei u ya ka Kur Passah wa sdang ya kani ka Hotel wa Restaurant wow e khih e kreh ya ki khynroo khyllood.

Heijooh i por da kitbok u ya ka Borbon Hotel & Restaurant khnang wow rah naam ko ya ka Jowai kamjooh wa ka Ri Loom Jaiñtia waroh kawi.

Ha kani ka Hotel em 8 tylli ki kamra, ka Restaurant wa ka Rooftop Swimming Pool.

Ya ki kyntien khublei da yoh na u Montri Passah.