Da wai ya ka Chartered Accountant Office “Premi Dkhar & Associates” ha Khliehriat

Ynne ka sngi da wai ya ka yung krehkaam Chartered Accountant Office yong u Premi Dkhar uwa man kam u Chartered Accountant, kawa em ha Wika Complex Khliehriat, East Jaiñtia Hills kawa ye u man leh kawa nyngkong dooh ha kani ka thaaiñ.

Ya kani ka Office da wai emburom da u Kyrmen Shylla, montri ka sorka jylla, wei da kyrkhu kyrdoh ya ka da u Most Rev. Victor Lyngdoh, u Bishop ka jylla niam Jowai, hei ya emlang ka bei u pa, kiwa ha yung ha sem wa ki paralok yong u Premi Dkhar.

U Kyrmen Shylla kam u kongsan, da e khublei u ya u Premi Dkhar uwa da poi cha kani ka thong wow pyndep yei puræ yong oo hadooh wow yoh u ya kani ka kyrdan Chartered Accountant, wei da ong u leh wa ini u man ko kam i kyrkhu ya ka thaaiñ wa ka jaitbru, kamjooh leh wow man ko kam i pynchlur ya ki khynroo wow lai ki ya kani ka puræ Chartered Accountant, khamtam wa duna kiwa dep ya kani ka jait puræ. Da kitbok kitrwiang u leh ya u Premi Dkhar wow nang ye u wow krehbha neibynta i bha i miat yong ki paidbah wa ka imlang ka sahlang.

U Most Rev. Victor Lyngdoh, DD Bishop ka jylla niam Jowai uwa da e ya i kyrkhu kyrdoh ya u Premi Dkhar wa i kaam i yong oo. Da kyntu u ya oo wow kyriuñ u cha u Blai man-i-por ha i krehkaam yong oo, wei kyntu u leh wow kreh hok wei wow yarap ya kiwa duk wa suk.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U Premi Dkhar ha ki ktien sñiawngooh yong oo da pynsñiaw u yei sñiawngooh ya ka bei u kpa wa kiwa ha yung ha sem yong oo. Pynsñiaw u leh yei sñiawngooh ya u montri ka jylla wa ya u Most Rev. Victor Lyngdoh.

Ya kani ka yalang da pynlai da u Felix Synnah Syiem uwa man u Education Secretary yong ka Parish Lad Rymbai.

Kajiak chaphang u Premi Dkhar. U Premi Dkhar toh u khon ka Tharsila Dkhar wa u Nowel Phawa na ka chnong Iongkaluh kawa em hapoh ka East Jaiñtia Hills District. Da sdang u ya i puræ yong oo na Iongkaluh wei hadien da puræ won u ha ka Khliehriat Higher Secondary Shillong, hadien da puræ won u ha Shillong College wa ha St. Anthony’s College. Khaddooh da pyndep u ya i puræ Chartered Accountant na ka Institute of Chartered Accountants of India, Eastern Region Kolkata.