U Montri Rangbah ka jylla, u Conrad K Sangma ynne da wai u ya ka Dare to Dream Academy, kawa man ka chlem e sikai yalehbol yong ka Dream Foundation deiwa ya krehlang waka Assam Rifles Public School, BBFS Residential Academy, Indian Football Foundation wa ka Baichung Bhutia Football School (BBFS) wa em ha SAI, NEHU.
U Conrad hawa e yei klam da pynsñiaw u yei sñiawngooh ya ka Dream Foundation wa u Baichung Bhutia kiwa da jied ya ka Shillong kam ka thaw wow booh ya kani kawa nyngkong dooh ka Residential Football Academy ka thaaiñ North East iwa da man i burom ya ka jylla kamjooh leh pynyoo ko yei em sap ki khynroo ka jylla kamjooh ka North East ha ki kaam Sports.
Da khana u leh wa neiliang ka sorkar Meghalaya ha kini ki snem kiwa da dep da pynman ko ya ka STAR Talent Identification Programme kawa pynemkaam da ki stat sayan deiwa booh da ki kyrdan yong ka pyrthai hawa sylli ya 5000 ngut ki khynnah na kylleiñ ka Meghalaya. Wei i thong toh yow chem kiwa em yei sap nadooh dang khian yow ye u pyneh pynsan ki deiwa pynbiang yeiwa emkaam ki yow ye ki u chimbynta ha ki yakob wa har rukom.
“Kyrmen i wa ha u 2036 Olympics daw em kiwa napoh ka Meghalaya kiwa daw ye u yoh takma ya ka ri wei yow poi cha kani ka thong da sdang ya kani ka STAR Talent Identification Program deiwa e sikai leh katkam ka kyrdan yong ka pyrthai heijooh i por wow pynchlur ya ki Coach wa kiwa yalehke da sdang e yarap leh da ka poisa,” da ong u Conrad.
Chooh chooh da ong u wa i kam kiwa mihkhmat paidbah, ki heh sorkar kamjooh ka imlang sahlang em ki por ym sñiawthooh i yei angnood ki khynroo kamtæ ka sorkar katni da sdang ko boon ki kaam yow yarap ya ki khynroo khyllood deiwa kyrchaan ym du ha ki yalehke kamjooh hei tem i put wa kiwi kiwi. Kamtæ da yooluti u wa kani ka Academy daw man ko ka kabu ksiar yow pynku ya ki kaam yalehbol ha ka thaaiñ.
Neiliang won u Baichung Bhutia hawa e yei klam da ong u wa ka BBFS e ko yei sikai wa bha tam heiyatoh wa kiwa yalehbol kiwa dang khian rta hadooh ki khynroo kiwa em hadooh 17 snem i rta ha kylleiñ ki thaw sikai yong ka wa em hapoh ka ri India.
Da khana u leh wa ka BBFS da pynmih ko ya chiboon kiwa yalehke kiwa da yalehke katni ha kiwa boon ki Club wei boon kiwa yalehke toh kiwa na Manipur, Mizoram wa Meghalaya. Da ong u wa kani ka e sikai deiwa sah ha ki Residential Academy toh yow pynchlur nadooh dang khian wow chimkhia wow chim ya ka yalehbol kam ka laad kamai ja-kpoh heijooh i por khlem da dooh ya ka puræ puthi.
Kamwa man kattæ, kani ka chlem e sikai da em ko 50 ngut ki khynnah khynroo kiwa na kylleiñ ka North East.
