U Montri ka chnat Health & Family Welfare, u Wailadmiki Shylla ha ka 6 tarik uni u bnai da wai paidbah u ya ka Digital Learning Centre ha District Library Jowai hajrong ka thong u pynkrai chooh chooh ya ki laad yoh yei stat i tip katkam ka juk Digital neibynta ki khon khynroo khyllood ka District.
Ha kani ka sngi da emlang u Deputy Commissioner ka West Jaiñtia Hills District, u Abhinav Kumar Singh, ka Assistant Commissioner, ka E. Ch. Momin, u Assistant Commissioner, u F. Passah uwa da embynta nawa sdang wow pynlai ya kani ka kaam heiwa dang ini wot da chah kyrriah noh u cha East Jaiñtia Hills District, neitæ u W.H. Gassah District Librarian Jowai.
Ha kani ka Centre da em 18 tylli ki kor Computer ha deilang ka Internet wa smat wei kani ka Centre toh kawa da mang poisa deiwa krehlang ka CM Catalytic Fund -Promoting Digital Learning waka Inclusive Access to Knowledge.
Ha kani ka Centre waroh kiwa pynpsiah dkhot hapoh ka Library ye ki u pynemkaam khlem iwon iwon i su, wa kynthup leh ya ki khynnah skur, neitæ ya kitu kiwa em ka thong u yakhun chakhmat hei im, wa ya ki dkhot yahkhmat ha ki chnong ki thaw.
Ha kani ka jooh ka sngi u Montri da wai haroh u ya ka Book Fair wa ar sngi wa da pynlai da ka yung krehkaam u Deputy Commissioner ka West Jaiñtia Hills District ha pchem ka District Library.
U Montri hawa klam yooluti u wa kani ka Digital Learning Centre u man ko i kyrkhu ya ki khon khynroo ka District, hei wow pynku ko yei myllien puræ kot wei wow yarap ko leh hei lai luti chakhmat neibynta ka mynried.
Ong u wa neiliang ka sorkar da pyrchang ko katwa ye u pynbiang yei emkaam yong ki paidbah katni khamtam ha kani ka juk yakob wa emkaam u tip neipor cheipor iyi wa jia næ em haki soodong yong i khnang yow ye lai chakhmat hei im.
Kyntu haroh u wow pynemkaam hok wei chim kabu ya kani ka Digital Learning Centre khnang wa i wanrah ka sorkar neibynta i myntoi ym sepai i.
Kyntu haroh u ya ki paidbah wow em yaka thong wa chajrong, khnang yow ye pyndap yaki Post wa emkaam haka jylla, neibhah wa i dooh khih dooh kreh ym du haki kyrdan wa cha tre weiwa hapyrdi, tangwa wot ki kyrdan wa rap hakhlieh heiwa ym em bru napoh ka jylla hanlada khut thap kren leh deiwa e nongmuna u yaki Post Doctor haka chnat yong i chait i khiah.
Heijooh i por pyntip u wa ka thong yong ka sorkar ym kut du ka Digital Learning Library du ha District Library donhi tangwa daw pyrchang leh u wai yaki Library khian haki dong ki chnong.
Kamjooh yooluti u wa i wai ya kani ka Book Fair wa ar sngi leh u man i myntoi ya ki paidbah.
Ka Assistant Commissioner, ka E. Ch. Momin, pyntip ko wa ha kani ka Book Fair wa ar sngi haka 6 tarik waka 7 tarik ye u yoh boonjait ki kot naki Stall wa da chongdai daki bru yong ka thaaiñ, ka jylla wa kiwa wan Assam.
Kiwa chimbynta haki Stall Book Fair kynthup ki Publishers wa ki Organization kam ka Rikhasi, Books and Brews, ka North Eastern Social Research Centre wa Saura Mandala Foundation.
Da em leh ka Stall wa ye u yoh yutip heiyatoh waka Admission Online waka ALS Coaching Centre.
Chibynta kani ka Book Fair, da pynman leh i yakob dro, thoh Essay neibynta ki khynnah skur.
Da em leh ki Stall baam wa ka rynsan rwai.
Discussion about this post