Ka e sikai wa mynkna hapoh ka Skill Meghalaya heiyatoh waka Street Food Vending namo kammon wow chet baam da wan wai ya ka ynne ka sngi da u MA Challam, EAC ka West Jaiñtia Hills kam u kongsan ha ka yalang wa pynman ha Kiang Nangbah College Auditorium.
Da emlang leh ka Principal ka Kiang Nangbah Govt. College ka Dr. (Mrs) EM Blah kam ka symbood kongsan, u Lambor Suchen uwa man kam u Skill Development Officer naka yung krehkaam ka Meghalaya State Skill Development Society (MSSDS) waka Heileen Diengdoh naka Greta Solutions Training Academy.
Kani ka e sikai wa daw pynman ha Kiang Nangbah College toh kawa 3 bnai neibynta ki 100 ngut kiwa da yabhah mar 25 ngut ha ki soo bynta wei ka e sikai toh kawa man-ka-sngi iwa chi kynta chiteiñ chi sngi.
Kani ka e sikai toh neibynta waroh wei emkaam u man kiwa da pyndep ya ka Class VIII wei kawa da leh da ka Greta Solutions Training Academy hapoh ka Skill Meghalaya wei da kyrchaan poisa daka sorkar jylla hapoh ka Meghalaya State Skill Development Society wei u sdang ko nadooh ka 23 tarik uni u bnai.
Hadien wa pyndep ya ka e sikai daw yarap leh ya kiwa chah sikai wow yaleh ki yow yoh ram na ki Bank yow sdang khih.
U kongsan hawa e yei klam da ong u wa na ki bru wa em hapoh ka jylla, 3 bhah namo 74% toh kiwa em hapoh 35 snem, kamtæ da ong u wa hawa pyrkhat ya ki khynroo iwa nyngkong dooh toh i bor ki khynroo wei hap wow pyrkhat kammon wow pynemkaam ya ini i bor yei kaam wa bha.
Da pynwandur u yeini waka wah kawa kai deiwa ong wa lada ye wow kah dam ka daw ye wow pynmih bordiñ kamtæ da ong u wa ini man i jooh wa ki khynroo yow pynemkaam yei bor ha ki kaam wa bha ym toh u man kam ka um wa chlai wa ktah ya ka chnong ka thaw.
