Ka “Eri Weave–Hand Woven Silk by Women of Meghalaya,” i thaaiñ that deiwa pynemkaam dei kti da u khñiang ryndia wa tip kam Eri Silkworm da wai ya ka ynne da u George B Lyngdoh, MLA ha Prime Startup Hub, J N Stadium, Polo, Shillong.
Ya kani da sdang da ka Iaishah Rymbai, kawa man kam kawi na ki 50 ngut namo ki Top 50 Entrepreneurs ka PRIME Cohort 2.0, wei ka rukom thaaiñ wa tip kam ka Eri Weave toh wa pynemkaam dei kti wow kylleiñ ya u kse ryndia kamjooh wow pynwan dur ya ka that.
Hawa e yei klam, u George da pynsñiaw u yei kmen wow yoo yei mynsien wym kynran dien ka Iaishah Rymbai yow pynmankaam yeiwa angnood ko, deiwa ong u wa kani ka Eri Weave klam ko leh chaphang ki kynthai yong i, i dur wa tipmit ya ki, i thaw i bhaw yong i wa iwa thrang i neini chakhmat. Da e nongmuna u ya ka Iaishah Rymbai kawa da sdang ya ka Cooperative Society deiwa em du 5 ngut ki dkhot wa i jop kiwa pynmih dud ka Umroi deiwa ban joor u leh yei emkaam wow yoh ya kiwa yahkhmat wa biang.
U F A Kharkongor, Commissioner and Secretary, Department of Textiles, da klam u chaphang i kreh ka sorkar yow pyntipmit pyrthai ya i pyrtuid “Ryndia” wei deiwa kynthuplang yei thaaiñ that deilang wa i ri khñiang ryndia hapoh ka Silk Samagra 2 Scheme, da mih leh boon kiwa thaaiñ that hapoh ka jylla.
U K N Kumar, Chairman Farmer’s Welfare Commission hawa e yei klam da pyntip u wa na ki 2000 tam ki Cooperative Society wa em hapoh ka jylla, 1740 tylli toh kiwa krehkaam wei da em ki ha ka kyrdan C Grade Category. Wei boon na ki Cooperative Society emkaam bha ki yei kyrchaan, heiwa u Kumar da e nongmuna u leh ya ka Gujarat waka Maharashtra heiwa ki Cooperative ye ki wow man kam ki kor wa wanrah yei roi i paar, kamtæ da ban joor u yei emkaam ya ka sorkar wow embynta chooh chooh ha ini i kaam yow pynkhlan ya ki Cooperative Society.
Ka Iaishah Rymbai hawa khana yei lai luti ko da khana ko wa da sdang ko ya ka Cooperative Society yong ka kawa e pyrtuid “Kamai haba Shongkai” deiwa yarap lang ki 5 ngut ki kynthai kiwa da lai na iwi i chnong cha iwi yow pynsñiawthooh chaphang wow kyllaiñ kse ryndia wei yow thaaiñ that leh. Katni ha ka Society yong ka da em ki hadooh 100 ngut ki dkhot wei da ye ki u pynmih T. 2 lak chi bnai.
