Ka Maitlynti Rural Development Society kawa em ya ka yung krehkaam hapoh ka chnong Bataw, East Jaiñtia Hills kawa da seiñ ha ka 05-10-2019, deiwa yarap ka yung krehkaam ka District Horticulture Office, East Jaiñtia Hills District da yoh ko wow chna ya ka Horticulture Collection Centre hei lut kawa T. 4 lak heiwa na kani da pynlut T. 2 lak na ka Society hi kawa em ha Priangkhla, Bataw.
Yow pynjanai yei krehkaam Society da chna hi leh ya ka yung krehkaam yong ka hei lut wa T. 3 lak.
Kamtæ ya kani ka Horticulture Collection Centre deilang waka yung krehkaam da wan wai paidbah ha ka 14 tarik uni u bnai da u MLA ka thaaiñ uwa man leh kam u Montri ka sorkar jylla, u Kyrmen Shylla kam u kongsan deiwa emlang u G. Warjri, MCS Additional Deputy Commissioner uwa man leh kam u Project Director DRDA yong ka East Jaiñtia Hills District kam u symbood kongsan deilang wa kiwa yahkhmat ka chnong Bataw, u Dr. T. Shylla, BDO Wapung C&RD Block, ka H. Suchiang, District Horticulture Officer wa kiwi kiwi de.
Yei thaw wow chna ya kani ka Centre da e sñiawbha da u President ka Society, u Bilis Pyrtuh.
Ka H. Suchiang da pynsñiaw ko yei kmen wow yoo wa ka Society da kreh chitom ko hanla da ye wow e yarap du T. 2 lak hapoh ka MIDH Scheme 2019-20 tangwa da ye ko wow leh palat ya iwa da ye u e yarap.
Neiliang u Kyrmen Shylla da ong u wa ki paidbah em ki yei chaniah wa khroo ya kani ka Society wow yarap ya ki warep ka thaaiñ wei da kular u wa ki sahep ka District wa smat ki wow yarap ya ki warep lyngba ka Society.
U General Secretary ka Society, u Deihok Sumer da pyntip u wa ka Society daw thied ko ya ki mar rep wa em ha ka thaaiñ yow pynlang ha kani ka Centre wei wow pynpoi cha ki yaaw kiwa em hapoh ka ri-loom Jaiñtia wei wow pynyoh nong ya ki warep hapoh ka thaaiñ. Da ong u leh wa lada i mih wa mih na ki thaw rep man ko du kamwa 20 lane 50 kilo da man ko i dooh nong wa khroo ya ki warep lada lai dai ki cha ki yaaw neibhah ka luti man ko kawa jngai wei da lut ka nong du ha ka bai kari.
