Ka Dorbar Chnong Mukhla Nongrim ynne da yoh ko u wai ya ka Khnap Thangbru (Eco-Friendly Cremetorium) ha loom thang-bru ka chnong wa em ha Pdeiñ Iongjat Mukhla Nongrim deiwa emlang u Wailadmiki Shylla, MLA ka Jowai Constituency uwa man leh kam u Chairman la Meghalaya Urban Development Authority (MUDA) kam u kongsan, u MDC ka thaaiñ u Ailad Bhoi kam u symbood kongsan deiwa sakhilang u Dolloi ka Elaka Jowai, u Puramon Kynjin, u Dolloi ka Elaka Nangbah, u R.M. Garod wa u Pa Langdoh ka Seiňraij Mukhla, u Wanbha Lyngdoh deilang kiwi de.
Da sdang ya kani ka yalang dei diang burom na u Secretary yong ka Dorbar Chnong Mukhla Nongrim, u Standbyme Sari wei da pynbood dei klam na u Waheh Chnong warim ka Mukhla Nongrim, u Buhlut Suna uwa da klam yei emkaam yong ki ya ka khnap thang-bru ha ka pyrthai ki sngi wa katni.
Neiliang u Pa Langdoh ka Seiňraij Mukhla, u Wanbha Lyngdoh da ong u wa kam ki khon yong ka Niamtre emkaam ki u pynneh pynsah yei man yei long ka niam kamjooh leh da kyntu u ya ki longkñi mankñi wow pynneh pynsah ya ka niam kamjooh leh da ong u wa lada ym chynna jngai i yeini ym ye u pynemkaam de ya kani ka khnap thang-bru.
Da yoh leh yei klam na u General Secretary yong ka Sengkhihlang, u Mario Biam uwa da khana yei emkaam ya kani ka khnap thang-bru yow pyndep ya ka lehniam khaddooh ya ka metyap yong u bru næ ka bru, da ong u leh wa ha kini ki sngi dang du 70% donhi wa pynemkaam ya ki khnap thang-bru neidaw wa dang em boon ki thaw wym pu bien u pynemkaam ki.
Da bood sa i klam na u Pa Dolloi ka Elaka Nangbah, u R.M. Garod uwa da pynche u wa kani ka yung man ko kam chibynta ka yung wa khaddooh yong u næ ka bru hachwa u lai cha u Blai Trekirot, da pynche u leh wa hap bood i katkam wa yah i por ymtoh u neh heijooh bait neibhah wym poi i cheiwon cheiwon leh.
Da yoh leh yei klam na u President ka Seiňraij Jowai, u O.H. Toi uwa da khana leh kattu katni chaphang u (T) Kambell Chullai uwa da seiñdur nyngkong ya kani ka khnap thang-bru heiwa da chimpor ya oo kamwa 8 snem u pynmiat pynbiang, u pyntoh pyntne hadooh wa de ye wow pynemkaam ka wei katni da chna leh ha kylleiñ ka Khasi, Jaiñtia wa Garo Hills.
Da ong u leh wa na waroh ki khnap thang-bru kiwa dadep chna, kani kawa katni toh kawa smat dooh neibhah da ye u pyndep ya ka du 4 bnai donhi.
Da yoh leh yei klam na u Pa Dolloi ka Elaka Jowai, u Puramon Kynjin uwa da khana kammon u pynneh pynsah ya ka ramaw kamjooh leh wow pynemkaam ya kani ka khnap thang-bru kam ka dak wow burom ya kiwa chna, wei deiwa em ko man ko chibynta kam wow yada ya ka ramaw nei pam ya ki dieň ki khloo, da ong u leh wa i pynemkaam ya kani man ko leh i myntoi ymtoh du ya kiwa yap donhi, man ko leh i myntoi wa ya kiwa dang im de.
Ha kani ka sngi da pynkup burom leh ka Dorbar Chnong Mukhla Nongrim ya waroh ki waheh wasian kiwa da wan sakhi lang ya kani ka sngi.
Neiliang u Ailad Bhoi da ong u wa kani ka sngi man ko i jop ya ka Dorbar Chnong Mukhla Nongrim hi waroh kawi, da ong u leh wa kani ka khnap thang-bru daw yarap ko ya ka chnong chiboon heiwa daw lait ki na ka la-ær wa sih kamjooh leh da lait u pam ware ya ki khloo ki kjam.
U Wailadmiki Shylla hawa e yei klam da ong u wa daw yoh boon i myntoi deiwa pynemkaam ya kani ka khnap thang-bru nadooh wym emkaam de wow pynemkaam chiboon ki dieñ wei da kyntu u leh wym hoi u tieñ ki wow pynemkaam ka.
I chna ya kani ka khnap thang-bru toh deiwa lut i sep wei pait i yoo da ka Dorbar Chnong Mukhla Nongrim hi waroh kawi kamjooh da yoh yarap na u MLA kamwa Rs. 5 lak wei i lut waroh yow chna dapoi ko Rs. 23 lak.
Discussion about this post