Ka 8 tarik yong uni u bnai da man ko ka sngi wow sah khana pateiñ yanom ya ki khon ka Elaka Sutnga khamtam ya ki khon ka Seiñraij Chnong Jarain Sutnga heiwa da wai ya ka Khnap Thangbru kawa em hapoh ka chnong Jarain, Elaka Sutnga wei da wan wai ya ka da u MDC ka 25 Sutnga Nongkhlieh Constituency, u Richard Singh Lyngdoh hei em ryngkat lang leh u MLA ka thaaiñ, u Shitlang Pale, ryngkat wa ki waheh nadooh u Francis Swer, kiwa heh naka Seiñraij Jowai nadooh u President yong ka u OR Challam, u Dolloi ka Elaka Jowai, u Puramon Kynjing wa kiwi kiwi.
Ya ka yalang ha kani ka sngi da pynlai da u Generous Malang, heiwa da sdang ya ka yalang da i ngooh Blai na u Fineless Malang, da yoh i kyntien pdiang burom na u Peter Lamare uwa man leh u GS ka Seiñraij Jarain.
Da yoh ya ki kyntien maitphang na uwi na ki waheh ka chnong Jarain, u Mondaystar Dkhar heiwa da ong u wa kani ka Khnap Thangbru kawa da chna pynwandur da u Kambell Chullai da man ko kam ka nuksa wa ka Niamtre hi toh kawa kynsai hadooh kattæ wei lyngba i ye wow pyndep yei kaam niam katkam wa yah i por deiwa ye u antaad yei ktah ya ka rymaw nadooh ki dieñ ki seij hadooh yei tngit ka la’ær deiwa kyntu u leh ya kiwa mihkhmat wow kyruiñ cha ka thaaiñ khamtam i emkaam yong ka.
U President ka Seiñ Raij Jowai, u OR Challam leh da e u i klam ha kani ka sngi wei da pynkynmoo u wa sorkar Meghalaya hi dadep kular ko wow e sa 31 tylli ki Khap Thangbru cha ki chnong waphær waphær ka Ri-loom Jaiñtia han ladang man iwa dangsahteiñ hadooh katni leh.
U Dolloi ka Elaka Jowai, u Puramon Kynjing hei klam da ong u wa i pyndep yei niam thang hei yung dulan paki toh i wow pyndep yei hukum u Trekirot kamwa da pun leh dei diñ 10 bnai hapoh u Trop Ksiar Trop Rupa u liwan leh lyngba i diñ lyngba ka niam thang.
U RS Lyngdoh kam u kongsan da ong u wa i ye yong oo wow pynyoh ya kani ka Khnap lyngba ka SAG 2018-19 ka JHADC toh wa thrang u wow pynneh pynsah ya ka Niamtre wa em cha kani ka thaaiñ wei kani ka chnong Jarain da man sakhiat ko sadu ka donhi wa em ki khon ka Niamtre hapoh ka Elaka Sutnga.
Da kyntu u leh ya kiwa pynlai ya ka Seiñraij Chnong Jarain wow sumaar ki ya kani ka Khnap deiwa ong wa lada ki khon ka Niamtre Chnong Jarain maya ki ya oo toh ym hoi de u kylla ki chawi, neibhah ladang kylla ki chawi pynyoo i wa kani ka Khnap wa e u ym de wa pynemkaam ya ka.
Ha kani ka sngi da yoh leh yei klam na u Waheh Cnong ka Jarain, u Eveningstar Dkhar wa ki kyntien e khublei na ka manbei Phonris Kamar.
Da pynphooh pynphieñ ya kani ka sngi da ki rwai na ki khon kynroo khyllood ka Seinraij Chnong Jarain wa i chaad na ki khon ka Shlem Sikai Niamtre ka Seiñraij Jowai.
