Ka M.M. Hall wa em ha Lumpyrtuh Mihmyntdu deiwa hap hiar kajiak na ka luti khian wa em ha rood u sarokbah mar pyrchah ka Vespa Showroom, kawa mantre da u Mothabneiñ Suchiang, da wai paidbah ya ka ynne ka sngi da u MDC ka thaaiñ, u Brightstar Chyrmang hei emlang ki waheh dong waphær ka chnong Mihmyntdu wa kynthup u Bot Ryngkhlem, waheh dong Loompyrdi, u Dominic Biam waheh dong Salini Colony, u Precious Ryngkhlem waheh dong Moowamon wa kiwi najrong kiwa chah khut sñiawbha kam u Dr. Rihajan Susngi wa kiwi.
Haka yalang wa pynlai da u Rev C.L. Susngi uwa man u khon yong u tre kani hi ka Hall, da pynkynmoo u yei lailuti u pa yong oo, wei ong u leh kani ka sngi man ko ka sngi wow sñiawngooh u e i yaroh ya u Blai wa theh u i kyrkhu wot hadooh wa ye u chna wei wow wai ya kani ka yung Hall ha kani ka sngi.
Neiliang u Mothabneiñ Suchiang kam u tre hawa klam ong u, ya kani ka Hall da chna khnang u ka hajrong ka thong wow yohlaad ki paidbah wa khian i yung i sem, i dwar i pchem u wan pyndep ya ki jait lehkmen waphær waphær ha kani ka Hall wei ye leh wow pynman yalang wa kiwi kiwi de.
Da ong u wa ha kani ka Hall pdiang sñiawbha ya waroh khlem da thaw ya ka niam ka rukom næ ki jaitbru. I dor won ya kiwa dooh ye ki u e katwa joh wa jam i bor ki, ya kiwa dap wa biang won daw em dei dor neibhah dei mynkna ym yoh u e katwa toh kawa hap pynlut hi yow chna ya ka.
U Brighstar Chyrmang hawa klam da yaroh u ya ka thong wei angnood u tre kani ka Hall uwa em i mynsiem wow rap pyrkhat kyrpang ya kiwa rap duna i yoh i la.
Heijooh i por ong u lyngba i em kani ka Hall daw man i kyrkhu wa khroo ya kiwa boon wa lang la hei yatoh ka imlang sahlang, ki bru samen wa kiwi, neibhah ngait skhem u kani ka Hall wym pynmyntoi ko du ya kiwa lehkmen khawai, tangwa wot ki yalang waphær waphær yong ki bru samen næ yong ka sorkar leh wym dam ki u wan pynman ha kani ka Hall.
Yooluti u wa u tre kani ka Hall deilang ka yung ka sem yong oo u nang yoh chooh chooh ki yei chait i nang, khang yow ye chooh u wow e i chakri la haka niam ka Balang kawa oo em u, kamjooh leh cha ka imlang sahlang.
Discussion about this post