Ynne ka sngi da man ko kawa sahkynmoo ya ka East Jaiñtia Hills heiwa da yoh u wai ya ka madan wa tip kam ka East Jaiñtia District Sports Association (EJDSA) Artificial Grass Football Ground ha Dienchynrum wa da chna ha i lut wa T. 2.5 klur wa da yoh na ka District Mineral Foundation Trust.
Ha kani kani ka yalang u Montri ka sorkar uwa man leh u MLA ka thaaiñ, u Kyrmen Shylla da man u kam u kongsan katwa u Deputy Commissioner ka District, u Abhilash Bharanwal da man u kam u symbood kongsan.
Neiliang u waheh chnong ka Dienchynrum, u Welbert Nongtdu uwa man leh kam u Vice President ka East Jaiñtia District Sports Association da khana u wa ya kani ka madan da sdang i kreh da u Kor Sympli wei da pyndep won ya ka da u MLA wa katni ka Khliehriat, u Kyrmen Shylla.
Neiliang u Bharanwal hawa e yei klam da ong u wa kani ka madan toh katkam wa angnood ki paidbah ka District wei da khana u ya ka parom heiwa kammon da sdang u chna ya kani ka madan wei yei lai luti wow kreh nadooh wa sdang.
Neiliang u Kyrmen Shylla hawa e yei klam da ong u wa i lai luti ki waheh da ye wow pynman ya kani madan hadooh wa man ko katni.
Da e khublei u ya waroh ki waheh ha ki snem wa da lai wow yarap poisa wow lai yalehbol ha ki chnong waphær waphær khamtam ki chnong wa jngai.
Chooh chooh da e yaroh u leh ya u DC wa da kreh chitom u wow pyntikna wa da chna pynmiat ya kani ka madan.
Ha kani ka sngi da saam leh ya ki khusnaam cha ki khloor yalehke na ka District wei da da pynphooh ya ka da ki chaad wa i rwai.
Da pynman leh ya ka yalehbol wa nyngkong ha kani ka madan hapyrdi kiwa mihkhmat paidbah kam ki MLA ki MDC wa ki waheh chnong wa ki dkhot ka EJDSA heiwa da jop ki MLA wa ki MDC da ka yachut Penalty.
