Ka A.N. Play & Stay Haven wa em ha Tuber Chohchrieh (BHAB), East Jaiñtia Hills District wa em harood u sarokbah, ha ka 2 tarik uni u bnai da yoh ko wow wai ya ka madan Futsal kamjooh leh ya ar tylli ki yung thaw sah namo ki Homestay neibynta i myntoi ki khon khynroo khyllod ka thaaiñ hei kaam Sport, kamjooh leh ya ki bru uiñke sawari wa wan na baar kiwa emkaam u lehke kamjooh leh wow sah miet.
Ya kani ka madan da wan wow wai da u Kyrmen Shylla, MLA ka thaiñ uwa man leh u Montri sorkar, hei emlang u Dy. CEM ka JHADC u Lasky Rymbai, u Chairman ka JHADC u Dr. Sankey Shangpung, u G. Pala, General Manager ka District Commerce and Industries Centre, Khliehriat, ki waheh chnong ka Tuber Chohchrieh wa Tuber Kmaichnong, kiwa chah khut sñiawbha wa kiwi.
U tre yong kani ka A.N. Play & Stay Haven, u Autonomous Phawa hawa khana yei lai luti ong u wa ya ki 2 tylli ki yung thaw sah (Homestay) da chna u dei yaraplang ka chnat Tourism wa ka District Commerce and Industries Centre, Khliehriat, katwa ya ka madan Futsal won da chna u deiwa pynlut na oo hi waroh i jait wei kiwa kreh leh pynemkaam u da ki mistri na kani hi ka thaaiñ.
U Lasky Rymbai hawa klam kam u symbood kongsan sñiawkmen u wow yoo wa ha ka thaaiñ East Jaiñtia nadooh wa khang tih mooyong boon kiwa da sdang khyrngiat hajrong kammon u thooh ki laad neibynta u yoh khih yoh kreh wei ym du ya samen tangwa wot ya ka pateiñ. Kamtæ i sdang mih ki Homestay ha East Jaiñtia man i yahluti u Blai wa stat neibhah lada chaniah bait ha u mooyong katwon hi-eh u neh uwa daw lut.
Kamtæ da pyn-eh-daw u ya ka chong Tuber Chohchrieh wa Tuber Kmaichnong kamjooh ya u tre thaw yow man kani ka thaw kawa e myntoi ya waroh lang.
Neiliang u kongsan, u Kyrmen Shylla leh sñiawkmen u wa ki chnat sorkar da pyrchang ki u pynyoh pyntne yei emkaam ki paidbah khamtam kiwa uiñke suwari neibhah ha ka jylla dang duna bha ki thaw sah neibynta ki bru wa wan na baar.
Ong u wa i angnood wow pynku yei kaam uiñke suwari ha ka jylla man iwa sepai lada ym yoh u e thaw sah thaw dem ya kiwa wan na baar, tangwa deiwa em kam kini ki bru wa mih chakhmat u chna ki yung thaw sah man i yarap wa khroo ya ka sorkar wa ya waroh kiwa emkaam thaw sah.
Heiyatoh wow chna madan lehke won ong u wa oo jooh klam jooh pynchlur u ya ki lok ki jor neibhah neiliang ka chnat Sports khamtam ka sorkar MDA-2 da pyrchang ko wow e ki Scheme neibynta u chna ki madan yalehke.
Wei hadooh ynne ka sngi ar tylli ki madan heh wow lehke 11 ngut chiliang daw chna hapoh East Jaiñtia Hills District, kawi ha Khliehriat Constituency kawi won ha Sutnga Constituency.
Ong u hanlada daw yoh ya kitai ki ar tylli leh tip bait wym dap wym biang katkam wa emkaam ki paidbah, kamtæ sñiawkmen u wa lyngba i em ka District Mineral Foundation (DMF) Fund da pyrchang pteiñ i chna kattæ, wei la le tylli kiwa dadep wai hapoh Constituency yong oo.
Hanla kattæ leh ym pu joh pu jam neibhah em kiwa dang hap u yang hadooh 11-12 waje i miet yow yoh yalehke.
Neitæ najrong ki madan yalehke ong u wa emkaam leh sa yaka Synthetic Track yow yoh ki khon khynroo khyllood ka East Jaiñtia Hills District u pynpliah hei yakob phet pyllah.
Kamtæ da pyn-eh-daw u leh ya u tre kani ka thaw wow ye u pynlai chakhmat ya kani ka kaam, wei u man kawa pynmyntoi ya ki khon khynroo khyllood ka East Jaiñtia Hills kamjooh kiwa uiñke suwari.
Ha kani ka sngi u Kyrmen Shylla da e sñiawbha u leh da ki Jersey cha ka A.N. Play & Stay Haven.
Ha kani ka sngi da yoh leh i klam na ka Dari Sutnga kawa naka chnat Tourism, u G. Pala, u Dr. P. Shylla na ka chnat i chait i khiah, na u Lar Bang, waheh chnong Tuber Chohchrieh wa kiwi.
Discussion about this post