Ka MLA ka Sutnga Saipung, ka Santa Mary Shylla ynne ka sngi da wai ko ya ka Mooriap Border Outpost (BOP) wa em ha ka chnong Mooriap hapoh ka Saipung C&RD Block, East Jaiñtia Hills deiwa emlang u MDC ka Sumer, u K. Langstang, u Deputy Commissioner ka East Jaiñtia Hills District, u Shivansh Awasthi, u Superintendent of Police, u Giri Prasad, u Public Prosecutor ka East Jaiñtia Hills, u S. Pdang, u Dolloi ka Elaka Sumer, u K. Mannar deilang ki waheh chnong kani ka thaaiñ.
Neiliang ka MLA hawa e yei klam da pynsñiaw ko yei kmen wa da yoh u wai ya kani ka BOP deiwa e khublei leh ya waroh kiwa emkti wow pynman ya kani ka kawa jop yow pynmankaam yei angnood ki paidbah.
Da kynmoo ko leh ya kiwa boon ki moochynhut wa da maad da ki paidbah ha kani ka thaaiñ ha ki phaw snem kiwa da lai wei kani kla BOP daw e ko yei chngaaiñ ya kiwa chong chnong wa haap hapoh yong kani wa kynthup ya ka Mooriap, Umkyrpong, Lakasein, Samasi, Mynthlu, Kremmyrsiang, Pala, Mynthning wa kiwi de.
Neiliang u Deputy Commissioner won da ong u wa deiwa wai ya kani ka Mooriap Border Outpost (BOP) da man ko u moomær wa emkaam bha wei da e khublei u yei kyrchaan ka MLA ha kiwa boon ki kaam nadooh wow pynlait Ambulance, i chna Community Hall, ki sarok thymme wa kiwi kiwi de.
Da e khublei u leh ya ka sorkar jylla hapoh i yahkhmat u Conrad Sangma kam u Montri Rangbah wa da pynlut bha yei bor i sor neibynta ka chnat pulit kawa man ka chnat kawa kreh 24×7 ha waroh ki thaw. Da pyntip u wa lyngba ka Police Infrastructure Renovation Fund (PIRF) da ye wow pynchna thymme ya kiwa boon kiwa emkaam ki pulit.
Deiwa em kani ka BOP, ki paidbah kani ka thaaiñ ym emkaam de wow lai ki cha jngai kattu heiyatoh wa ki kaam ka aiñ.
Discussion about this post