Ynne ka sngi da man ko ka sngi wow sahkynmoo ya ka chnong Mustem heiwa da yoh u wai ya ka Mustem Water Supply Scheme da u Montri ka sorkar jylla uwa man leh u MLA ka Amlarem, u Lahkmen Rymbui hei emlang u Addl. Chief Secretary, u DP Wahlang, u CH Challam Chief Engineer ka PHE wa kiwi kiwi.
Ya kani ka Scheme wa chongdor T. 9,13,40,000 da chna pyndep ya ka du hapoh 9 bnai donhi wei ka um da riñ na Wahmon.
U DP Wahlang hawa e i klam da ong u wa kani ka Scheme toh kawa da yoh na ka NABARD heiwa da smat u yoh Sanction wei da yoh u pyndep smat yei kreh.
Da ong u wa barabor hapoh kani ka Scheme RIDF da da kynthup du ka Top wa ki Sorkari (Public Tap) tangwa kani toh ka sien wa nyngkong dooh hapoh ka jylla wa poi um cha man la ki 472 thlu-yung heiwa ka chnong u yoh ki 500 litre ka um ha ka chi sngi.
Neiliang u Lahkmen Rymbui hawa e i klam ha kani ka sngi da ong u wa i ye wow pyndep ya kani ka Scheme toh nei yakrehlang yong kiwa chong chnong kamjooh ki sahep ka PHE wa u Contractor.
Da ong u wa ini man iwa sñiawkmen heiwa ka jylla da sakhi ya ki kaam wa da leh ka sorkar ha ki 50 snem wa dalai heiwa da em leh boon ki skur wei hapoh ka chnong Mustem da yoh ya ki skur, u sarok wa ka Scheme um wei ini da ye u man iwa sakhiat deiwa yoh ya ka ri wa ka jylla yong i hi.
Chooh chooh kyntu u leh yei krehlang khnang wow ye u yoh ya i roi i paar deiwa kdaw ya ki thaw uiñke kiwa em hapoh ka chnong Mustem kiwa ye u pynmiatdur ya ki heiwa da pyntip u wa ym slem de daw chna noh ya u sarok na Chyrmang cha Iongnoh wei cha Mustem wei deiwa em uni u sarok daw suk bha kiwa lai uiñke wei neini daw ye ki paidbah ka chnong u yoh khih yoh kreh.
Heijooh i por da kyntu u ya ki tre chnong wow sumaar ki ya ki Pipe um, ki kor, ki Top kiwa hapoh kani ka Scheme neibhah kini waroh da mantre da ki tre chnong waroh.
Ya kani ka yalang ynne ka sngi da pynlai da u Waheh Chnong ka Mustem u H. Shylla, wei da yoh leh i klam na u CR Challam, u Chairman ka chnong u J Shylla wei da pynphooh pynphieñ ya ka da ki rwai na ki khon yong ka chnong.
