Ka Lami Designing & Tailoring Institute kawa man ka thaw e sikai soor wa i chna riam wa em ha Moowakhon Mihmyntdu kawa da sdang ha u snem 2021, ha kani ka kynti da ye won ko u wai sa ya ka Production Centre heiwa ki paidbah ye ki u thied ya ki that, ki sula, ki muna wa kiwi ki jait wa soor wa pynmih da kani hi kani ka Institute lyngba ki khynnah wa da pyndep yei chah sikai.
Kamtæ ya kani ka Production Centre da wai ya ka haka 30-09-22 da u A. Malngiang, General Manager District Commerce and Industry Centre, hei emlang u Lambormi Suchen, Skill Development Officer, Meghalaya State Skill Development Society, u Precious Ryngkhlem, Waheh Dong Moowakhon wa kiwi.
Ka Iaraplang Pakma kawa man ka tre yong kani ka Institute kawa man leh kam ka Fashion Designer kawa da em ha ini i kaam la 15 snem da ong ko ha ka chi snem i lai luti ko wow e sikai ya ki khynnah chem ko wa man ki kiwa em sap, kamtæ lyngba i wai ya kani ka Production Centre i thmu toh wa hadien wa ki khynnah pyndep ki yei puræ u yoh kreh ki leh pyn heini hi.
Da khut ko leh wow wan chah hikai kam ha ka Embroidery wa i soor wei kitu kiwa ym pu tip iyi iyi chaphang i soor leh ye ki wow wan wei ym emkaam u man ki kiwa da pyndep ya kawon kawon ka kyrdan puræ wei kini ki jait soor wa leh dei kti kamjooh da ka kor ye u pyndep 3 bnai hadooh 6 bnai donhi.
Ki chah sikai kiwa rap heh kyrdan kam ka Advance Diploma in Tailoring wa ka Advance Diploma in Fashion Designing toh kiwa ar snem i chah sikai. Em leh kiwi kam ka Diploma in Dress Designing kawa 6 bnai kamjooh ka Diploma in Tailoring kawa chi snem wei kini waroh toh neibynta ki chynrang wa kynthai.
Da khana ko leh i thmu toh yow pynchlur wow seiñ khih, u e kreh wei wow pynlai yaaw da kini ki mar wa pynmih kiwa pyndep puræ wei wow e laad ya ki wow kreh ki pyn ha kani ka thaw hi.
U Lambormi Suchen da pynsñiaw u wa i rukom krehkaam ka yung krehkaam yong oo toh u e sikai iwa 3-4 bnai neitæ won u pyrchang pynyoh khih won ya kiwa da dep chah sikai.
Kamtæ yooluti u wa neini chakhmat daw ye ka chnat krehkaam yong ka sorkar u yakrehlang wa kani ka Institute neibynta u pynku yei sap ki khon khynroo khyllood, heijooh i por wada man leh kawa ye u pynmih ya ki jait sor wa boonjait.
Neiliang u kongsan ha kani ka sngi u A. Malngiang, General Manager District Commerce and Industry Centre yaroh u ya kani ka institute wa du hapoh chi snem da ye ko u pynku cha ka Production Centre wei yooluti u wow nangku chooh chooh ko.
Heijooh i por khana haroh u ya ki laad yarap wa ye u yoh na ka yung krehkaam yong oo kawa tip kam ka Prime Minister’s Employment Generation Programme (PMEGP) neibynta u seiñ ya kawon kawon ka khih wa yatoh kam ka Manufacturing lane ka Service Centre wei kani kawa wai ha kani ka sngi ong u man ko kam ka Manufacturing lane Production Unit.
