Kat dang mih ki sngi i kaam uiñke suwari dang ku i hapoh Ri-loom Jaiñtia waroh kawi heiwa ynne ka sngi da wai ya kawi na ki thaw sah pyngngaad neibynta kiwa uiñke suwari kawa tip leh kam ka Loomkyntoor Resort & Spa kawa man kawa nyngkong dooh kam kani ha Ri-loom Jaiñtia waroh kawi.
Ya kani ka thaw da wan wai ya ka ynne ka sngi da u Deputy Commissioner ka West Jaiñtia Hills, u Garod LSN Dykes hei emlang u SP ka District, u Bikram D Marak, ka DSP (C) ka CW Lyngdoh wa kiwi kiwi.
Neiliang u Teiborlang Hinge uwa man u tre (Proprietor) yong kani ka thaw da pyntip u wa i daw wa chna ya kani ka thaw toh wow pynku ya ki kaam uiñke suwari hapoh Amlarem Civil Sub-Division waroh kawi neibhah wa kani ka Sub-Division man ko ka thaw wa boon bha ki thaw uiñke.
Chooh chooh da ong u wa ya ini da leh kam chibynta wow yarap wow yoh khih yoh kreh ki seiñ uiñke suwari wa em ha ka thaaiñ khamtam kam ka Shkenpyrsit Tourism Society heiwa ha kani ka thaw da yakrehlang chirup wa ki bor ka chnong.
Hapoh u pood kani ka thaw da em ki thaw kyndehke ki khynnah, ki yung sahmiet, ki kchaaid wa ki thaw sum katkam wa kai ka wah, ka thaw baam (Restaurant) wa kiwi kiwi.
Kani ka thaw toh kawa jngai du 17 Km na Jowai kawa em hapoh ka chnong Shkenpyrsit.
