Ka Restaurant wa thymme kawa em ha Mynthong, Jowai hajan ka Stand War kawa da e pyrtuid Ham’s & Sam’s Cuisine (Place to Meet, Treat & Eat) da wai paidbah ka ha ka 23 tarik uni u bnai da u Elad Pohshna, Assistant Executive Engineer ka MePDCL Jowai, kam u kongsan hei emlang u waheh chnong ka Mynthong, u Lamphrang Pohktai kam u symbood kongsan, najrong kiwi won kiwa yahkhmat ka dorbar chnong Mynthong wa kiwa chah khut sñiawbha.
Ha ka yalang tbian wa pynlai da u Hame Jungai da yoh i duwai kyrkhu kyrdoh na u Jacinth Son Passah u Tymmen Wasan ka Balang Presbyterian Mynthong, wa i klam pyn-eh-bok na u kongsan wa u symbood kongsan.
U Lamphrang Pohktai hawa klam da yaroh u ya u Saman Pohktai wa u Hame Jungai kiwa man ki tre kani ka Restaurant deiwa ong wa sñiawkmen u wow yoo yei mih ki khon ka chong u sdang seiñ khih seiñ khan hapyrdi boon kiwa ood wym yoh khih yoh khan.
Yooluti u wa kani u man ko ka nongmuna ya kiwi won ki khon ka chnong, neibhah i seiñ khih hi ym mut du wow yoh khih ya idæ, tangwa man ko leh ka laad e khih ya kiwi.
E haroh u i kyrkhu kyrdoh wa kani ka Restaurant u man ko kawa pynmyntoi ya ki tre, kiwa kreh, kamjooh ya ki paidbah wa wan baam.
Neiliang u kongsan, u Elad Pohshna da yaroh u ya kini ki arngut kiwa chlur u sdang ya kani ka khih neibhah wow sdang ya iwon iwon hap u em i mynsien raikut.
Yooluti u wa kani ka dukan u man ko kawa klam bru heiwa ki bru u wan khnang ki yow maad yow baam yei baam wa chet ha kani ka dukan lada em ki cheiwon cheiwon leh.
Da ban joor haroh u hajrong i emkaam u man ki bru wa tip u pdiang u yaklam wa ki bru wa psiah baam, wei u yaleh pynneh yei khooid i pliah.
U Saman Pohktai hawa klam pynsñiaw u i sñiawngooh ya waroh kiwa da embynta hei wow pynlai bait ya kani ka kaam.
Ha kani ka dukan ye u yoh ya ki jait baam wa boonjait wei i por wai toh nadooh 11:00 waje i step hadooh 8:00 waje miet nadooh ka sngi Monday hadooh Saturday.
Discussion about this post