Jowai: Ka Seiñraij Indoor Sports Hall wa em ha Madan Ryngkaw Tpep-Pale, Jowai wa chna ya ka hei dor wa T. 2.01 Klur ha i thaw wa heh kamwa 900 Sq. Mt. da wan wai ya ka ynne ka sngi da u Deputy Chief Minister u Dr. R.C. Laloo wa u montri ka Sports and Youth Affairs u Zenith Zangma hei emlang ki heh ka District, u Dolloi ka Elaka chirrup wa ki heh ka Seiñraij Jowai wa kiwi kiwi.
Ya kani ka Indoor Sports Hall da sdang u chna nadooh u Thohlakhmi (Feb) 2015 wei da pyndep ha u Naisaphra (Aug) 2017 wei ya ka poisa da e da ka North Eastern Council wa ka tnat Sports and Youth Affairs ka sorkar jylla yow yarap ya ki khynroo khyllood u pynbniah yei sap yong ki ha ki kaam yalehke waphær waphær.
Hapoh kani ka Indoor Hall em leh ki kamra kylliang sula, ki paikhana, i thaw yalehke Badminton, Table Tennis, Carrom Board wa kiwi kiwi.
U President ka Seiñraij u O.R. Challam da pynsñiaw u yei sñiawngooh ya u Dr. R.C. Laloo wa chimkhia u pynyoh poisa wow chna ya kani ka Indoor Hall wei da yaroh u leh ya u Zenith wa em u i thrang wow pynku ya ka kaam sports hapoh ka District.
U Dr. R.C. Laloo da ong u wa kani ka Sports Hall da chna ya ka ha i thaw wa biang bha wei daw man ko ka kyrkhu ya ki khynroo khyllood kamjooh ya kiwa heh lada pynemkaam bha ki ya ka yow lait u pynlut por cha ki kaam wa bakla wei da yooluti u wa daw pynmih ko ya ki bru wa pawnaam na ka.
U Zenith Sangma da e khublei u ya ka Seiñraij Jowai wa da e ko ya ini i thaw wow chna ya kani ka Sports Hall deiwa ong leh wa ki kaam Sports toh kiwa emkaam bha ki khynroo khyllood wow chimbynta katni khamtam ha kani ka juk phone heiwa boon da mylliñ ki ya ki Sports. Da yooluti u wa deiwa em kani ka Sports Hall daw pynkynmoo biang ko ya ki yeiwa emkaam ki Sports hei im ki man ka sngi.
Discussion about this post