Ka Fire & Emergency Service Training School, Mairang, West Khasi Hills, da wan wai ya ka ynne da u lamphang ka jylla, u Metbah Lyngdoh, hei emlang u montri ki kaam pohyung ka jylla, u Lahkmen Rymbui, u Director General of Police, u R. Chandranathan wa kiwi kiwi.
Ha kani ka sngi, u Chandranathan, da e u ya ki kyntien pdiang burom wei da pynbood won da ka Medal Presentations cha ki pulit ka chnat kiwa da yoh ya ka Governor’s Medal wei da pynyoo leh ya i rukom krehkaam ka F&ES Organisation.
U Lahkmen Rymbui hawa e yei klam da yaroh u ya ka chnat kawa da kreh wow chna ya kani ka Training School deiwa kyrmen ya kiwa boon ki kaam wa bha wow mih na ka.
Neiliang u Metbah Lyngdoh da khana u yei emkaam wow sdang ya ka F&ES Training School wow esikai ha kiwa boon rukom neini chaphrang.
I thaw wa da chna ya kani ka Training School toh ha i yong ka General Administrative Department wa ka Office of the Executive Engineer PWD (Roads) Mairang.
Ka Training School daw esikai ko hajrong ka ki yurim sikai tympleh diñ namo ka Basic Elementary Fire Fighting Training wa ka Cadre Course ya ki pulit wa thymme.
