Da wai ya ka St. Aloysius Hospital Ummulong

Jowai: Ka Aloysius Hospital kawa em ha Ummulong West Jaiñtia Hills District, kawa pynlai da ki Sister, Hospitallers Sisters of Mercy, da wai yaka ha kani ka 8 tarik da ka Sister Elsina Arackal (Sister Superior yong kani ka Hospital) wei da kyrkhu ya kani ka Hospital da ka Umkhooid Umkyntang da u Most Rev. Victor Lyngdoh DD, Bishop ka Jyllaniam Jowai.

Ha chwa wow wai da pynman yaka yalang wa tbian ha pchem yong kani ka Hospital. Ka Sister Elsina Arackal ha i klam heipor wa wai ya kani ka Hospital, da pynsñiaw ko yei sñiawngooh ya u Most Rev. Victor Lyngdoh, Bishop ka Jyllaniam Jowai uwa da e bor ya ki Sister Hospitallers Sisters of Mercy wow chna ya kani ka Hospital hei wow yarap ya ki bru ha i liang ka chait ka khiah wei e ngooh ko ya u Blai Tre Kynrad wa da i kyrkhu yong oo hadien wa da yoh bor da ye u sdang wow chna syndon ya kani ka Hospital wow yarap ya ki bru katwa ye ha i liang ka chait ka khiah. Neitæ da ong ko hanlada i kreh ya kani ka Hospital ym pu ye u pyndep bha wei i kreh dang lai i chakhmat, la kattæ leh da ye wow wai ha kani ka sngi yow yoh ki Sister yong kani ka Hospital u yoh chong yoh sah wei wow nang pynkhreh wei pynbait ya ki kamra chong kamra sah ki Sister wei wow pynkhreh ya ki kamra ki Doctor wa ki kamra thiah kiwa kjut. Neitæ ka Sister, Elsina Arackal, da ong ko kamwa man kattæ kani ka Hospital dang wai du ya ka Pharmacy wei man da dep janai wow pynkreh ya ka yung wa i wan ki Doctor, daw pynbna paidbah wa ki bru u tip ki wow wan chah sumaar ha kani ka Hospital.

Ha kani ka sngi da yoh leh ya i klam kyrkhu kyrdoh ya kini ki Sister ki wakreh ha kani ka Hospital da u Most Rev. Victor Lyngdoh, Bishop ka Jyllaniam Jowai wei bood sa ka knia Mass wakhooid kam ka dak ka sñiawngooh ya u Blai wei wow paan chooh chooh ya i kyrkhu na u Blai wow theh ya i kyrkhu kyrdoh hajrong kini ki Sister kiwa pynlai ya kani ka Hospital, ya ki Doctor ki Nurse kiwa daw wan kreh ha kani ka Hospital wa ya kiwa kjut wa chitom kiwa wan chim dawai wei chah sumaar ha kani ka Hospital ha ki por wa ki sngi ki wow wan wa ki dawai ki dachin wa ka sumaar wa yoh ki na ki Doctor ha kani ka Hospital yow yoh ki yei chait i khiah kamwa thrang wei angnood. Ha i jooh i por u Bishop Victor da kyntu u ya ki paidbah kiwa em ha kani ka yalang wai wow ya krehlang wa ki Sister kiwa pynlai ya kani ka Hospital wa kani ka Hospital u nanglai ko chaphrang hei wow yarap ya ki bru u yoh ki ya i chait i khiah.