Da wai ya ka thaw e sikai chet baam wa em ha Syndai

U Abhinav Kuman Singh uwa man leh u Sub-Divisional Officer (Civil) yong ka Amlarem Sub-Division ha ka 24 tarik da wai paidbah u ya ka thaw e sikai wa pynman da ka Society for Urban and Rural Empowerment (SURE) ha ka Dorbar Hall yong ka chnong Syndai Kmai Chnong.

Ha kani ka sngi palat sanphaw ngut kiwa wan chah hikai da wan ko wow chimbynta ha kani ka yalang.

Hawa e i klam kam u kongsan, u Abhinav da ong u wa kani ka e sikai man ko kawa emkaam bha neibynta ki khynroo ka thaaiñ deiwa yaroh ya ka SURE wa da chimkhia leh hajrong i baam tynre yong ka thaaiñ.

U Abhinav da ong u leh wa ha dang ini uwi u uwa chet na Assam da jop u ha ka yakob Maser Chef wei da kylli u wa lada na Assam ye ki wow jop weileh ki yong i ym ye ki.

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Kani ka e sikai u man ko neibynta 17 sngi wow e sikai ya ka rukom chet ya ki baam Indian, Chinese wa ki baam tynre wei kani ka e sikai toh kawa da jooh dep pynman ha ka thaaiñ ha ki snem wa dadep kam ha chnong Nongtalang, Amlarem, Nongbareh wa Darrang.

Ha kani ka sngi da yoh ya i klam na u Dr. H.H. Mohrmen uwa da khana chaphang ka SURE, ki kaam wa kreh ko wei chaphang ka e sikai leh kamjooh. Neiliang yong u Lambormi Suchen uwa man u Skill Development Officer ka West Jaiñtia Hills da batai u hajrong kani ka Project kawa da wan na ka Ministry kawa pait ki thaaiñ khappood wei na ka yung krehkaam u SDO Amalrem, u DC wa ka Skill Development ka jylla.

U Daman Lakashiang uwa man leh u Dolloi ka Elaka Satpator da sñiawngooh u wa ka sorkar da kyruiñ ko cha ka Elaka wei ngait skem u wa daw yarap ko khamtam ya ki khynroo ki wym pu yoh kreh.

Ya ka yalang da pynlai da ka Ilasiewdor Gashnga kawa pait ya ki kaam e sikai hapoh ka SURE.

Kiwa chah hikai wa da wan chimbynta da wan ki na ki chnong wa marjan kam na Amlari, Jong U Chen, Amjalong, Nongtalang najrong ki chnong kiwa haap hapoh ka Syndai kam ka Syndai Kmai Chnong, Syndai Mission wa Syndai Lyngkot.

Ha kani ka sngi da emlang leh u Donbok Syndai uwa man u Waheh Chnong ka Syndai Kmai Chnong wei ya ki baam sngi ha kani ka sngi da pynbiang da ka Kynjoh Shaphrang SHG na Syndai Mission.