Shillong: Ka thaw e ya i chait i khiah kawa tip kamka Mebaai Tribal Health and Wellness Centre (Indigenous Holistic Therapies and Kerala Massage), da wai ya ka ynne ka sngi da ka Serina Wahlang, ha i emlang u montri ka chait ka khiah u AL Hek wa kiwi de kiwa chah khutsñiawbha ha Golflinks, Shillong. Ya kani ka Centre da wai deiwa krehlang waka Vasudeva Vilasam, Kerala yow yoh ki bru u maad yei rukom pynchait pynkhiah lynga ka Ayurveda deiwa pynemkaam leh ya i khem doh Khasi.
U Hek hei klam yong oo da ong u wa kani ka Centre daw yoo yei yachem ka Ayurveda wa i rukom pynchait pynkhiah i warim yong u Khasi. I krehlang kini ki ar jait ki stat daw yoh myntoi ko ya ka jylla Meghalaya kawa em haka hadooh 3000 tylli ki jait dawai kynbat kamjooh em boon kiwa e dawai kynbat. U Hek da sñiaw u wa i rumkom khem doh i wa daw pynemkaam ha kani ka Centre daw yarap ko leh wow pynku ya ka kaam uiñke suwari hapoh ka jylla wei kamjooh yow pyntipmit pyrthai ya kiwa summar bru ki yong i deiwa e ya ki ya ka rynsan kawa toh rukom.
U Dr. Pradeep Jyoti uwa na Kerala da pyntip u wa ka Vasudeva Vilasam da bood ko yei sumaar Ayurveda ha kiwa boon ki thaw wa em ki nadooh u snem 1884. Da ong u leh wa daw yarap ki wow pynbha chooh chooh ya ki dawai Khasi yow ye u sumaar ya kiwa boon ki jait kjut kamjooh wow pynkukyrdan ya ki. Da pynsñiaw u leh yei thrang yong oo wow e sikai ya ki khynroo khyllood yow man ki kam ki warep wa kiwa pynmih ya ki dawai deiwa sdang ya ki karkhana.
U Dr. H Bani, uwa pawnaam kam uwa e dawai Khasi uwa chemphang bha ya ki jait jhoor wa ye u pynman dawai da khana u chaphang kiwa boon jait ki jait jhoor, ki thied wa kiwi kiwi kiwa em hapoh ka jylla kiwa pynemkaam wow chna dawai wei da kyntu u leh ya waroh wow rah ya ka khubor chaphang kani ka Centre wa ki jait sumaar wa e ko.
Discussion about this post