Da wai ya ka thaw paitke ha Syntuksiar hei lut kamwa T. 9 lak

Jowai : Hadien wa da dep pynman Fish Sanctuary ya i bynta ka wah Myntdu ha Syntuksiar, ynne ka sngi da wai sa ya ka thaw paitke kawa tip kam ka View Point kawa da chna da ka Jaiñtia Fishing & Environment Protection Association.

Ya kani ka thaw da wan wai da u Deputy CM ka jylla u Dr. R.C. Laloo kam u kongsan hei emlang u Deputy CEM ka JHADC u Andrew Shullai kam u symbood kongsan ha ka yalang wa da pynman hajan kani ka thaw.

Ya kani ka yalang da pyllai da u President ka seiñ u Lamwan Paswet wei da yoh i kyntien pdiang burom na u S.K. Lato.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

U General Secretary warim ka seiñ u Womlin Pakynteiñ da khana u ya ka parom wa ki luti kiwa ka seiñ da lai ko, ki eh ki khoo wa tyngkhooh ko nadooh u snem wa seiñ ya ka nadooh u snem 1993 wa i pyrchang ka seiñ wow pynneh pynsah ya ki doh-um kamjooh yow yada ya ka wah Myntdu.

Hei klam wa tbian u Secretary ka Construction Committe, u K.K. Pakma da pyntip u wa ya kani ka thaw da sdang chna nadooh ka 10 Wisu (March) 2016 yei ya ka dur wow chna næ ka model da e da u Jait Da-oo Sumer, wei da chna ya ka hei lut kamwa T. 9,10,437.

U Pakma da pynkynmoo u ya ka seiñ yei kaam wa sahteiñ yong ka khamtam ya i thmu wow ujor da ka PIL ha yung bichaar wow yada ya ka wah Myntdu na ki liar ki chka wa ki jakhlia wa kai cha ka wah.

Hei yatoh wa i thmu ka seiñ wow chna ya ka luti lai kjat nadooh na u mot sahnaam u Woh Kiang Nangbah hadooh wa poi ha kani ka thaw, u President ka Kiang Nangbah Iasiat Khnam Memorial Society, u Jait Da-oo Sumer da pyntip u wa ka seiñ da pdiang ko wow e ya i thaw wow chna ya ka luti lai kjat nadooh na u Mot hadooh wa poi kani ka thaw paitke.

Kam u symbood kongsan u Andrew Shullai da e yaroh u ya ka seiñ wei da yooluti u leh wa nei em kani ka thaw daw ye chooh u riñ ya kiwa uiñke sawari kiwa wan na kylleiñ ka jylla, ka ri wa nabaar ri leh kamjooh.

U Dr. RC Laloo hei klam kam u kongsan da ong u wa kani ka thaw man ko kawa pawnaam wei i johkhie ka seiñ JFEPA wow pynneh pynsah ya ki dakha ha kani ka wah man ko i kyrkhu ya waroh.

Da ong chooh chooh u wa nachwa heipor wa lai baamdoh jooh pynemkaam bait ki da ka um na kani ka wah, tangwa katni ym nood de u pynemkaam ya ka, kamtæ da kyntu u ya waroh wow em i sñiaw tre wow chimkhia wow yada ya ka kam ka wah ka yong i hi.

Ha kani ka yalang da e leh ya ka dorkhat cha u Dr. R.C. Laloo hei wow chna ya ka luti lai kjat nadooh u Mot Sahnaam u Woh Kiang Nangbah hadooh kani ka thaw wei ter ter hadooh wa poi ka dam wa da chna da ka Soil & Water Conservation hei lut kamwa T. 16.76 lak wei neilaing u RC Laloo da kular u leh wow yarap hadooh T. 12 lak cha ka seiñ.

Da pynkut ya ka yalang da ki kyntien e khublei na u General Secretary ka seiñ u NK Lamare.