U Montri Rangbah ka jylla, u Conrad K. Sangma ynne da wai u ya ka National Law University (NLU) ha i yung wow krehkaam ko chipor wa em ha Mayurbhanj Complex, Shillong deiwa sakhilang u Chief Justice ka Meghalaya High Court, u Sanjib Banerjee, u Montri ka chnat Puræ Puthi, u Rakkam A Sangma wa u Vice Chancellor kani ka University, u Prof. Indrajit Dube.
U Conrad hawa e yei klam da ong u wa emkaam wow booh dei thoh ya waroh ki dustur riti ki jatibru ri-loom wei da kyrmen u wa kani ka NLU daw man ko ka chlem wow thooh bniah heiyatoh wa ki aiñ riti dustur waroh ka thaaiñ North East.
Kamtæ da yooluti u wa kani ka NLU daw wanrah ko yei kylla heiyatoh wa i puræ puthi ya ka aiñ neibhah ha ki 50 snem nachwa neidaw wym biang ka thaw puræ da chem chitom wow e yei chakri wa biang heiyatoh wa iwa emkaam i yasaaid aiñ wei yow man ko leh ka laad wow kreh ya kiwa boon.
Ka sorkar da dep ko wow booh bhah T. 25 klur yow pynchna ya kani ka thaw wa chipor wow booh ya kani ka NLU heiwa da dep wow pynlut T. 19 klur.
Kam wow pynkynmoo wa ini wa dep da em i dawa na ki seiñ wow booh ya kani ka NLU ha East næ West Jaiñtia Hills neidaw wym em ka thaaiñ ya ka thaw puræ wa em naam.
