Da wai ya ka thaw sumaar bru ka Nazareth ha Phramer, WJH

Jowai: Ynne ka 31 tarik da man ko ka sngi wow sah kynmoo heiwa da wai ya ka OPD Unit yong ka Nazareth Hospital, Shillong ha Lad Pasyih Phramer, West Jaiñtia Hills District.

Ha kani ka sngi ha chwa u wai u Waheh Chnong ka Pasyih u Justine Phawa dei ah Ribbon ya kani ka thaw sumaar, da em ka yalang wa pyllai da u Michael Saioo heiwa da yoh yei pdiang burom ya ki Doctor wa kiwa wanlang wa ki kamjooh ya kiwa kjut.

U Bishop Victor Lyngdoh hei klam yong oo u da pynsñiaw u yei sñiawngooh wa khroo ya ki Sister wa ki Doctor yong ka Nazareth Hospital kiwa da smat u ap chkoor yei kyrpaad yong oo wow wan yarap ya ki bru kiwa kjut ha ri-loom Jaiñtia wei kam ka dak pdiang burom chooh chooh da yoh ya i rwai pdiang burom na ki khynnah Convent Phramer.

Ka Sister Dr. Noreen, Administrator Nazareth Hospital Shillong hei klam yong ka da pynsñiaw ko yei sñiawkmen ya kiwa chong chnong ka Pasyih kiwa pdiang sñiawbha kamjooh leh kiwa da chah wow wai ya kani ka OPD Unit. Da pynsñiaw ko leh yei sñiawngooh ya u Karbar Tyngkan, uwa da e mynkna ya kani ka yung yow yoh u wai ya kani ka thaw sumaar.

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Ha kani ka sngi da yoh leh ya i klam wow pynkmen ya kiwa wan thooh dawai da u Dr. G. Rangat uwa da ong wa hadien wa yoo u yei boon kiwa wan thooh dawai kiwa kjut na ri-loom Jaiñtia cha Shillong da pyn pyrkhat ko ya oo yei lut i sep ki paidbah hei lai i wan i bai dawai wei hajrong ini i yurim da wai ya kani ka thaw sumaar. Da pyntip u leh wa ha kani ka thaw sumaar daw em doctor ha ki ar sngi chi tayaw ha ka sngi wa ar wa ka sngi thohdien.

Ha kani ka sngi u tre yung, u Karbar Tyngkan da ong u wa dei mynsien sñiaw-wyrai wow yarap ya kiwa kjut da e u ya kani ka yung dei mynkna hadooh wa ye u chna ya i thaw sumaar wa paka ya ka Nazareth OPD.

Ki Doctor kiwa wan ha kani ka sngi kynthup ki ya ka Dr. Ibandalin Shangpliang MD Medicine, Dr. Ema Dkhar MS (General Surgeon), Dr. G. Rangat MS, CMO (Nazareth Hospital Shillong), Dr. Sister Noreen, ka Evarista Ryngnga (Pharmacist) wa ki Nurse. Ha kani ka sngi da em leh u Phadar Hilarius Lamare (Vicar General ka Jylla Niam Jowai), Phadar Ferdinand Dkhar (Procurator ka Jylla Niam Jowai), Phadar Manmbha Pakem, ki Phadar ka Parish St. Claret Phramer wa kiwi kiwi.