Ki lamieñ man ki, ki bynta wa emkaam bha ha i doh i pran yong waroh ki bru heiwa emkaam u man ki kiwa miat wa kiwa chkeh wei yeini da pynchlur wow sumaar ya ki nadooh wa dang khian dang khynnah.
Ynne ka sngi da yoh u wai ya ka Ummulong Dental Clinic kawa man ka thaw sumaar lamieñ kawa em haka Dong Iawpynsiñ, Ummulong.
Ya kani ka thaw sumaar daw pait da u Dr. Damanhi Rymbai heiwa ynne heipor wa wai ya ka da engooh u ya u Blai wa da yah luti u ya oo najrong wei da ong u leh wa kam u Doctor u e u yei sumaar wa paka wa janai tam ya kiwa emkaam.
Heipor wa wai ya ka da em ka yalang wa tbian kawa da pynlai da u Rev. R.I. Laloo heiwa da ong u wa man ko i kyrkhu ya ka chnong Ummulong kamjooh leh ya ki chnong wa chajan wot kiwa chajngai leh kamjooh.
U T.Bn. E. Lamare uwa da wai ya kani ka Clinic da kyrmen u wa ka Ummulong Dental Clinic u man ko i chakri ya ki bru yong ka thaaiñ ha i chait i khiah hapoh i pait i yoo wei sumaar u Dr. Damanhi Rymbai wei da kyrkhu kyrdoh u leh ya kani ka thaw.
Ya kani ka yalang da pynkut da u Marketsar Wankhar da i kyntien duwai.
Ha kani ka Clinic ye phi u yoh chiboon jait ki sumaar wa yatoh wa ki lamieñ.
