Ynne da man ko ka sngi wow sahkynmoo ha jylla Meghalaya heiwa da yoh u wai ya kawa nyngkong dooh ka thaw tih mooyong kawa man katkam ka juk katni namo ka 1st Scientific Mining Coal Block ha Meghalaya kawa tip kam ka ‘Saryngkham-A’ Coal Mine wa em ha Byndihati, East Jaiñtia Hills District wei yeini da wai da u Montri Rangbah ka jylla, u Conrad K Sangma lyngba ka Video Conference ha ka yalang wa pynman ha Byndihati deiwa emlang u Montri sorkar, u Kyrmen Shylla, ka MLA ka Sutnga-Saipung, ka Santa Mary Shylla, u Executive Member ka Jaiñtia Hills Autonomous District Council (JHADC), u Hambertus Nongtdu, u Deputy Commissioner ka East Jaiñtia Hills District, u Shivansh Awasthi, u Superintendent of Police, u Giri Prasad wa kiwi de kiwa chah khut sñiawbha deilang ki bru kani ka thaaiñ.
U Conrad hawa e yei klam da ong u wa u tre ka Mining Lease kani ka thaw toh u Dapmain Shylla uwa na Byndihati hi wei da e khublei u ya waroh kiwa da ya krehlang wow pynmankaam yeini hadien jan dap 11 snem kattu nadooh wa chah khang u tih mooyong.
Da ong u leh wa heipor wa man u kam u Montri Rangbah ha u snem 2018, iwa nyngkong dooh wa leh u hapoh ka sorkar MDA toh wow wai biang yei tih mooyong wei ini da chimpor ko hadooh 6-7 snem hadooh wow ye u mankaam neibhah yeini ym pu jooh em lah nachwa.
Da pyntip u leh wa daw pyntikna wa kiwi leh u yoh bor ki wow sdang noh wow tih mooyong neibhah iwa eh toh du heipor wa sdang wei hadien wa yoh ar le ngut daw tipsap kammon u leh yow pynsmat yeini i kaam. Kamtæ da pynchlur u leh ya kiwi wow yaleh namo wow Apply u tih mooyong.
Neiliang ka MLA ka Sutnga Saipung da e khublei ko ya u Montri Rangbah wa hapoh i yahkhmat u da ye wow pynmankaam sakhiat ya kani ka Scientific Mining wei da yooluti ko wa ini daw pynpoi ko cha ka thong yow pynman ya ka Meghalaya kam ka 10 Billion Dollar Economy kat ha u snem 2028.
Kiwi de kiwa klam ha kani ka sngi toh u Hambertus Nongtdu, u DC wa u MLA warim ka Khliehriat, u Justin Dkhar.
Discussion about this post